La manifestación pola Oficialidá superó otru añu la lluvia

L’añal manifestación convocada pola Xunta pola Defensa de la Llingua (XPDL) percorrió esti vienres el centru d’Uviéu embaxo una lluvia que nun torgó que la sociedá civil asturiana reclamará la oficialidá de  la Llingua.

Coincidiendo como siempres col Día de Les Lletres y una hora primero de qu’entamara l’actu institucional de l’Academia de la Llingua nel Tearu Campoamor, la XPDL convocó a la sociedá asturiano col sofitu d’Iniciativa pol Asturianu y delles otres asociacions cíviques y de los sindicatos y  d’Izquierda Xunida, Podemos y Andecha Astur como cimeres formaciones polítiques favoratibles a la normalización.

La manifestación abríala la ‘Bandona’ de gaiteros pola oficialidá que dende va delles convocatories pon música a la marcha, siguida de pancartes de les entidames mentaes espar´dies ente los manifestantes. El Grupu Políticu d’IX na Xunta Xeneral, col so voceru, Gaspar Llamazares, llevaba una de eses pancartes y compartía protagonismu con un bayurosu grupu de diputaos de Podemos, como Emilio León, Daniel Ripa, Andrés Ron,  Héctor Piernavieja, la so diputada nel Congresu Sofía Castañón y la parlamentaria europea Tania González.

Na manifestación destacó esti añu una numberosa representación de la plataforma Conceyos Pola Oficialidá, col alcalde de Mieres, Aníbal Vázquez, y la vicealcaldesa d’Uviéu, Ana Taboada, ente los más nomaos, amás d’otros conceyales de distintos municipios asturianos.

Esti añu la manifestación esvióse pela cai Melquiades Álvarez pa volver a Uría per Doctor Casal y acabar, como siempre, delantre’l Teatru Campoamor d’Uviéu, como pue vese na galería de semeyes qu’ufre Asturnews.