La confirmación de Consuelo Vega como Direutora de Promoción Cultural precipita la dimisión de Ramón D’Andrés

La confirmación de Consuelo Vega como Direutora Xeneral de Promoción Cultural y Política Llingüística precipitaba esti xueves la dimisión de Ramón D’Andrés al frente de la Oficina de Política Llingüística. El caltenimientu de la Oficina de Política Llingüística como xefatura de serviciu torgaba la situación d’anguañu, ya que D’Andrés nun podía siguir en comisión de servicios nel so puestu sigún afitaren dellos informes xurídicos dela Universidá d’Uviéu. La decisión del Gobiernu Areces de nun ascender a Direición Xeneral a la Oficina de Política Llingüística, estremando esti serviciu de Promoción Cultural, ye la causa cimera de la dimisión del responsable de la política llingüística de la cabera lexislatura, eloxada pol PSOE como perpositiva.

Poro, la razón final de la dimisión de D’Andrés nun apaez na carta de renuncia que’l ex-Direutor de la OPL-y facia llegar a la nuea Conseyera de Cutlura estia día y na que se permitía, “en primer llugar, reitera-y la felicitación pol so reciente nomamientu como titular de la Conseyería de Cultura y Turismu, deseándo-y al mesmu tiempu que la so xestión tea enllena d’éxitos”.

Sigún asoleyaba nesta carta Ramón D’Andrés, “al comienzu de la pasada llexislatura 2003-2007, el Gobiernu de coalición formáu pol PSOE y IX-BA propúnxome, de común acuerdu, pa exercer el cargu de xefe de la Oficina de Política Llingüística, qu’entós se creaba. Mui honráu por esta propuesta, acepté con ilusión el cargu, y nestos años trabayé, xunto con un equipu mui cualificáu, en diverses facetes de la normalización llingüística de la llingua asturiana y el gallego-asturianu. A pesar de les circunstancies dacuando difíciles, el balance pue considerase −en llinies xenerales− satisfactoriu, algamándose oxetivos novedosos qu’asienten precedentes pal futuru y que nos consta que merecen l’aprobación de munchos sectores sociales involucraos na defensa de la llingua asturiana, y tamién de responsables nel ámbitu autonómicu, municipal y cultural.”

Darréu de los mentada, Ramón D’Andrés afita na so carta que depués de la llexislatura cola que se comprometiera “ye claro que terminó tamién la misión que se m’encargó, entamando agora una etapa nueva, dientro un marcu políticu diferente. En resultes d’ello, entiendo que nun procede continuar nel puestu, y por ello presénto-y la mio renuncia como xefe de la Oficina de Política Llingüística.”

A los nuevos responsables d’esti área de la xestión cultural, Raón D’Andrés deséa-yos sinceramente “los meyores éxitos nel so llabor, adelantándo-yos que la mio actitú col so trabayu va ser siempre de respetu, comprensión y collaboración allá onde seya posible, pensando en tou momentu en dir algamando mayores cotes na dignificación y normalización llingüística n’Asturies”. Sobre manera, D’Andrés diz tar “convencíu de que’l nomamientu de Consuelo Vega como Directora Xeneral de la materia ye un aciertu y una garantía de que la política llingüística va tar en bones manes”.