La Carrera pola Oficialidá celebrase’l 14 d’ochobre en Bimenes

El sábadu 14 d’ochobre a les 16 hores en Santuyano (Bimenes) va celebrase la Carrera pola Oficialidá qu’entamen la Xunta pola Defensa de la Llingua Asturiana y el Conceyu de Bimenes y que va tener dos pruebes: una llarga y competitiva de 16 km y otra non competitiva de 3 km.

El sábadu 14 d’ochobre próximu, a les 16:00 hores en Santuyano (Bimenes), va celebrase la I Carrera pola Oficialidá, que yá tien les incripciones abiertes y que va valir pa reivindicar la oficialidá del nuestru idioma. Trátase d’una prueba deportiva entamada pola Xunta pola Defensa de la Llingua Asturiana y el Conceyu de Bimenes, primeru d’Asturies que declaró la oficialidá nel so territoriu.

La carrera va tener dos pruebes:

· Carrera llarga de 16 quilómetros con caracter competitivu y que va dar una vuelta peles trés parroquies del conceyu. Esta carrera tien un preciu d’inscripción de 3 euros.

· Carrera curtia de 3 quilómetros, non competitiva y abierta a tolos públicos. Esta carrera tien un preciu d’inscripción de 6 euros.

Los dos percorríos van tener salida y meta en Santuyano y el preciu inclúi derechu a participar na carrera, dorsal con chip, seguru, camiseta conmemorativa, avituallamientos y bolsa del corredor o corredora que la organización consiga de los patrocinadores. Otra manera, va haber una entrega de trofeos  a les 19 hores pa los trés primeros clasificados, homes y muyeres, del percorríu de 16 quilómetros, mentes que pa la carrera de 3 quilómetros va haber troféu pal meyor home y muyer de la prueba.

Les inscripciones yá se pueden facer online na páxina web: www.cronocheck.es. El plazu p’apuntase a la carrera ye dende’l 12 setiembre a les 9:00 hores hasta’l 10 d’ochobre a les 24:00 hores.