La Caravana pola Oficialidá llega a Avilés coles mires puestes nel Estatutu d’Autonomía

El Conceyu Abiertu pola Oficialidá, presentó ayeri la Caravana que percorrerá na mañana del sábadu Aviles, Corvera y Castrillón, reclamando la oficialidá de la llingua na prósima reforma estatutaria. La movilización, que saldrá a les once y media la mañana de Cancienes, completase cola subasta pública a les siete la tarde de les obres d’arte cedíes pa la ocasión por unos sesenta artistes asturianos nel Palaciu de Valdecarzana.

Nel actu de presentación, Fernando Ornosa y Rogelio Crespo, portavoz d’esta plataforma qu’axunta a más 170 organizaciones polítiques, sociales y culturales asturianes, manifestaron les sos esperances na prósima reforma del Estatutu d’Autonomía, alvirtiendo de que, de nun oficializase la llingua, ‘el Conceyu Abiertu ta dispuestu a dir a los tribunales de xusticia pa facer valer los derechos de los asturianos’.

A les diez y media la nueche, el míticu grupu asturianu Dixebra, comprometíu dende los sos empiezos cola reivindación llingüística, va celebrar tamien los sos venti años de trayectoria cola grabación d’un conciertu en directu na Plaza’l Parche d’Aviles.