L.lena entama una campaña pa promocionar l’asturiano nel comerciu local

El Serviciu de Normalización Llingüística del conceyu de L.lena acaba de poner en marcha una campaña de promoción del usu del asturiano ente’l comerciu local. La iniciativa cuenta con un presupuestu de 2.000 euros y tien como oxetivu’l d’implicar a los profesionales del sector na promoción y normalización de la nuestra llingua nes relaciones mercantiles y afitar los nomes llariegos que s’ empleguen de manera avezada nos intercambios comerciales del conceyu.

La campaña fue elaborada pol Ayuntamientu de L.lena en colaboración con Xixón, Siero y la Mancomunidá del Cabu Peñes, conceyos qu’integren anguaño la Rede de Normalización Llingüstistica. Escoyóse’l pequeñu y medianu comerciu como oxetivu de la iniciativa por tratase d’un sector nel qu’esiste un contactu directu cola ciudadanía y porque apréciase una perda de palabres n’asturiano en determinaos campos léxicos (cada vez son menos empleaos nos comercios términos como gochu, piescos o tiñosu, por exemplo).

Los materiales que se van distribuir ente los comerciantes l.leniegos son:cinco trípticos, dedicaos a pescao, fruta y verdures; carne y embutíos; pan lleche y derivaos; y l’últimu dedicáu a la ropa, nos que s’informa del nome n’ asturiano de tolos productos avezaos. Inclúin amás dalguna información y suxerencia. La campaña implica tamién la creación y diseñu d’una marca diferenciadora que va identificar l’usu de la llingua asturiana nos comercios y la edición de pegatines de regalu pa poner nos paquetes con lemes como “esti regalu ye pa…” o “espero que te preste”. La campaña va cuntar tamién con distribución de bolses de papel nes que figura la imaxen de la campaña y cartelos informativos, que se van colgar nos comercios.