L’Arribada 2007 llega güei al so pieslle col 3er Certame de Monólogu Modernu

Güei termina l’Arribada 2007, pero tovía queda tou un día d’actos. A les once y media la mañana entama’l día cola presentación del cancioneru ‘Lírica asturiana de güei de Vicente Sánchez’. A les doce va ser Xosé Ambás, el popular etnógrafu presentador de la TPA, quien presente’l llibru ‘Historia y cuentos de tradicional oral “María Isabel ya Celestina”.

A les 12,30 va facese la presentación de ‘Trabayos musicales na tradición oral’ de Dani García de la Cuesta y a la una la tarde una tertulia ‘La lliteratura asturiana nos medios de comunicación’, que va entamar Próspero Morán, director d’Asturnews.com y presentador del programa Nós na TPA. Nesta tertulia van participar Ramón Lluis Bande, Rubén Cienfuegos, Fernando de la Fuente, Xurde Morán y Xandru Martino.

Dempués del descansu del meudía, a les cinco la tarde va ser el momentu pal ‘Diálogu col autor’, un momentu pa charrar col autor americanu afincáu en La Collá (Siero), qu’espublizó llibros como ‘Aldeanismos’ o ‘Paraíso Matorral’. A les cinco y media va presentase una nueva editorial ‘Araz Llibros’, que va tar dedicada al ensayu.

A les seis de la tarde, Inacio Rodríguez-Solar, Sabel Tuñón, Milio Rodríguez Cueto y otros miembros de la Tertulia Cultural ‘El Garrapiellu’, van presentar la ‘III Antoloxía de cuentios curtios El Garrapiellu’ y la convocatoria del Premiu de Cuentos Curtios d’El Garrapiellu’. A les seis y media Sabel de Fausta va presentar ‘Na solombra del silenciu’. Y a les 19 hores va ser Xosé Bolado quien presente ‘Na estación de los Relevos’

El día, no lliterariu, va pesllase cola tertulia ‘Identidá y lliteratura, un averamientu al ensayu políticu’, con una introducción de Sixto Cortina y la intervención de Lluis Xabel Álvarez, Ignacio G. López-Dóriga, Javier Neira, Pablo Rodríguez Alonso y Faustino Zapico.

Yá de nueche va celebrase la ‘Gala de pieslle de l’Arribada 2007’, cola presentación d’Inaciu Galán y les actuaciones de los monóloguistes Lluis Antón González, Benxa Pérez y Cellero, dientro del ‘3er Certame de monólogu modernu’, organizáu pola Asociación H.a Xareos en collaboración cola Arribada. Va ser, a partir de les diez de la nueche na Sala Albéniz de Xixón, na cai San Bernaldo.