L’Academia de la Llingua Asturiana va afayase nel Monesteriu de Les Pelayes

L’Academia de la Llingua Asturiana lleva agospiada dende 1981 nun pisu de la cai Marqués de Santa Cruz, y dende los sos entamos vien pidiéndose un llar que tea acordies a la importancia y l’actividá de la institución. Güei, y dempués d’un conceyu ente’l Gobiernu d’Asturies y l’ALLA, ta acabante sabese que l’Academia va treslladase “dientro d’alredor de dos meses”, al Monesteriu de San Pelayo, conocíu popularmente como de Les Pelayes, y hasta agora, llar del Archivu Hestóricu d’Asturies.

Nel conceyu celebráu esta mañana despacharon con Ana Cano, presidenta de l’Academia, el Presidente d’Asturies, Vicente Álvarez Areces, la Conseyera de Cultura, Mercedes Álvarez, y la Directora Xeneral de Política Llingüística, Consuelo Vega. Amás, participaron los académicos Roberto González Quevedo y Miguel Ramos Corrada.

El llar nuevu tien una superficie superior y unes meyores condiciones, polo que’l Gobiernu d’Asturies va invertir 24.000 euros añales, frente a los 18.000 que cuesta l’actual instalación na cai Santa Cruz. El llugar foi calificáu por Ana Cano como “agospiu estraordinariu” y reconoció “sabía que Chelo (por Consuelo Vega) tenía enfotu en solucionar esti problema”.

Ana Cano considera, asina, que se da “una bona solución pa un vieyu problema” yá que la sede anterior “nun podía selo d’una institución académica”, llamentóse.

Nes próximes selmanes tendrán qu’entamar les pequeñes obres d’acondicionamientu del nuevu llar, qu’esperen ocupar a lo llargo del branu.