L’Academia de la Llingua Asturiana, la única que nun recibe fondos del Gobiernu d’España

La organización Iniciativa pol Asturianu emitió un comunicáu nel que calificó’l retayu d’un 40% a los presupuestos de l’Academia de la Llingua Asturiana (ALLA) como “un ataque al idioma asturianu, nun contestu mui difícil pa la llingua d’Asturies, y teniendo en cuenta que l’ALLA ye una institución siempres austera y que yá hasta agora cuntaba con namás los fondos imprescindibles pal desenrrollu del so llabor”, recordando amás que la máxima institución llingüística asturiana “sigue ensin recibir fondos del Gobiernu central”, como sí reciben les academies del castellán, catalán, vascu y gallegu.

Iniciativa pol Asturianu pide al Gobiernu d’Asturies que “rectifiquen” esta partida del presupuestu prorrogáu pa 2012, “calteniendo, polo menos, la cantidá establecida pal añu anterior, y nunca con rebaxes penriba de la media del restu de los retayos de presupuestu”.

Amás, Iniciativa pol Asturianu, recuerda que ye tamién responsabilidá del Gobiernu d’España la financiación de l’Academia de la Llingua Asturiana, pues nos sos presupuestos incluyen una partida “pa financiar a toles academia de les diferentes llingües que se falen nel Estáu español”.

Los datos ufríos pola organización, que pueden consultase nos presupuestos xenerales de 2011, amuesen que la Real Academia Española recibe más de 4 millones d’euros, mientres que l’academia del catalán (l’Institut d’Estudis Catalans) recibe cuasi 1 millón d’euros, la de la llingua vasca, mediu millón d’euros y la Real Academia Galega, 200.000 euros. Pa la organización llingüística “esto supón una nueva marxinación hacia la nuesa llingua, que nun cuenta pa les autoridaes estatales”.

Por ello, Iniciativa pol Asturianu reclama al Gobiernu d’Asturies, amás del cambiu nos sos propios presupuestos, “qu’esixa al Gobiernu d’España una partida pa l’ALLA nos presupuestos xenerales, pa finar con esta marxinación a la institución asturiana y ayudar a la financiación d’una institución imprescindible pa la normativización del idioma”.

Retayen el 40% del presupuestu de l’Academia de la Llingua Asturiana