L’Academia de la Llingua Asturiana firmó un pautu de collaboración col Centru Asturianu de Valparaísu

L’ALLA anunció estos díes los términos del Pautu de collaboración que firmó’l pasáu 27 de mayu en Valparaísu, Chile. Nel actu tuvieron presenteses Ramón Trespalacios Collado en representación del Centru Asturianu de Valparaíso y como Presidente del mesmu y Pablo Xuan Manzano, en representación de l’Academia de la Llingua Asturiana. L’alcuerdu firmóse col envís “d’encontar el procesu de normalización llingüística nes xeres y llabores del Centru Asturianu de Valparaísu”.

El pautu ente les dos partes ta fechu en base a la Llei d’Usu y Promoción del Bable/Asturianu y por él apautaron que l’Academia de la Llingua Asturiana va sofitar llingüísticamente al Centru Asturianu de Valparaíso en toles consultes y duldes qu’esta entidá-y plantegue, teniendo en cuenta al Centru pa esparder cualquiera de les sos actividaes editoriales, formatives o d’otru tipu qu’acostume a programar.

Amás, l’ALLA, va facilitar al Centru Asturianu de Valparaísu el Boletín Oficial de l’Academia “Lletres Asturianes”, asina como cuantes publicaciones considere d’interés pa la emigración del fondu editorial qu’asoleya davezu.

Pela so parte, el Centru Asturianu de Valparaísu comprométese a esparder la conocencia de los finxos y les xeres de l’Academia de la Llingua Asturiana ente los sos asociaos y ente otros Centros Asturianos d’Hispanoamérica, amás de comprometese a dar puxu a la presencia de la llingua y la cultura asturiana en toles estayes de la so actuación.

L’alcuerdu inclúi la celebración añal del “Día de les Lletres Asturianes” nos primeros díes del mes de mayu, cuntando cola collaboración de l’Academia.

El pautu tien una duración d’un añu, pudiendo estendese indefinidamente.