Javier Fernández dixo que nun quier una cooficialidá que represente una “carga” pa los asturianos

Jesús Iglesias, coordinador d’Izquierda Xunida n’Asturies, acusó a la FSA-PSOE d’intentar “demonizar” y estimular el “rechazu” a la llingua asturiana “fomentando peligros inexistentes”. Esta yera la respuesta del coordinador xeneral d’IX a les declaraciones de Javier Fernández, secretariu xeneral de la FSA-PSOE, que dixere que n’Asturies existe un proyectu de nacionalismu al traviés de la cooficialidá del asturianu.
El máximu cargu del PSOE n’Asturies refirióse al idioma en dos actos, el vienres en Sariegu y el sábadu en Cangas. Fernández dixo que nun quier una cooficialidá que represente una “carga” pa los asturianos y amestó qu’hai un proyectu pa entamar el nacionalismu n’Asturies dende la referida cooficialidá. Al tiempu, amuesóse dispuestu pa “normalizar” el desenvolvimientu de la llingua asturiana.
Iglesias recordó-y a Fernández que n’Asturies yá existen movimientos nacionalistes, “lo mesmo qu’en munchos otros puntos d’España”, ensin qu’esa circunstancia suponga “nada grave”
“Los socialistes nun tán llexitimaos pa criticar agora’l nacionalismu cuando gobernaron con socios nacionalistes ne bien de territorios”, comentó. Detrás de les afirmaciones de Fernández, pa Iglesias, alcuéntrase por embargu la intención d'”alarmar” a la sociedá, “cuando equí nunca nun tuvimos nengún problema d’esi tipu”.
Sicasí, Iglesias nun cree que’l discursu de Fernández tenga nengún efectu ente la sociedá asturiano, porque los sos “argumentos tienen tan pocu rigor y base, que caen por sí solos”. Amás Jesús Iglesias dixo que Fernández “falsea la realidá” al insinuar que n’Asturies puea haber un “despegue del nacionalismu al través de la cooficialidá. Nun hai relación directa ente lo un y l’otru”, dixo.
Pa IX, la cooficialidá sólo tendría efectos positivos, porque representaría ampliar l’ámbitu de derechos y llibertaes de los asturianos, asina como’l reconocimientu del valor de la llingua asturiana como parte de la cultura y la tradición asturiana.