Izquierda Xunida pide aprovechar el puxu del ‘Estatut’ p’aumentar l’autogobiernu d’Asturies

Izquierda Xunida considera que’l puxu del Estatu catalán tien valir pa qu’Asturies s’enfote n’aumentar el so techu competencial col fin de nun quedar nuna posición d’inferioridá respective a otres comunidaes. El cabezaleru de la coalición, Jesús Iglesias, afaló a los políticos del país a nun quedar “viéndoles venir” na nueva configuración autonómica del estáu.

Pa Iglesias si de la nueva situación resultante hai perxuicios pa la nuestra comunidá la culpa “nun va ser de los catalanes sinón de los asturianos”.

El coordinador xeneral d’IX d’Asturies afirmó que “Hai que aprovechar estos meses de debate del ‘Estatut’ nel Parlamentu español pa dir articulando propuestes ente les fuerces polítiques asturianes pa intentar avanzar na busca de consensu y consiguir que’l modelu resultante nel Estáu nun seya lesivu y nun nos asitie nuna posición de subordinación con otres comunidaes”, argumentó.