IX critica la indefinición del modelu d’atención a la infancia

Izquierda Xunida va esixir al Principáu recursos económicos pa garantizar les obres de recuperación del Centru Maternu Infantil d’Uviéu, un recursu clave na atención a menores ya que’l so deterioru obligó a un desallugu parcial de les instalaciones.

La diputada d’IX Marta Pulgar sofitó güei les reivindicaciones de la sección sindical de CCOO en Bienestar Social, que denuncia la falta d’inversiones y la indefinición del Principáu sobre’l futuru d’estes infraestructures.

“Hai que definir qué modelu queremos pa l’atención a la infancia na nuesa Comunidá Autónoma. Desgraciadamente ye daqué que nun ta enriba de la mesa y nun lo sabemos. Y, pa eso, creemos que’l maternu infantil ye una prioridá. Ye un serviciu qu’hai que siguir emprestándolu y, en concencia, cola calidá que merez l’atención a los menores”, afirmó Pulgar.

Pa la diputada d’IX, l’alministración del país tien capacidá de financiamientu pa esta obra. Nesti sentíu, recordó que los 23 millones d’euros que se conseñaron a mayores nel presupuestu de 2017 pa inversión, tendríen de sirvir pa la execución d’estes obres, con un costu envaloráu d’unos 400.000 euros, una cifra bien penriba los 100.000 conseñaos pola Conseyería y que, si nun s’amplía, fadría imposible la so llicitación. “Si nun esiste’l conseñamientu presupuestariu necesariu nun puede llevase alantre”.