Portada Sociedá IX-BA presenta na so propuesta de reforma del Estatutu la oficialidá del asturianu

IX-BA presenta na so propuesta de reforma del Estatutu la oficialidá del asturianu

by asturnet

Izquierda Xunida y el Bloque por Asturies presentaron ayeri en rueda de prensa la so propuesta de reforma del Estatutu d’Autonomía por considerar que l’actual ye un proyectu ‘agotáu’. Na so propuesta d’Estatutu, la coalición busca un ‘mayor autogobiernu p’Asturies que dexe desarrollar la identidá cultural y llingüística’. Ente les principales piticiones d’IX-BA ta la d’oficializar l’asturianu por ser ‘la llingua propia d’Asturies’, asina como la que quitar la denominación de ‘Principáu’.

En plenu procesu de ‘revisión del Estáu’, en palabres de Jesús Iglesias, ‘sedría suicida quedar al marxen d’esta realidá y traicionar esti emplazamientu históricu’. Palacios, portavoz nacional del Bloque por Asturies, recalcó qu’Asturies ‘tien de tener más autogobiernu nel nuevu Estatutu, porque nel vixente la rexón vive nuna permanente frustración, negando la so identidá como pueblu’.

El responsable d’IX aseguró que si’l PP quixere participar na reforma, esta podría facese primero de qu’acabe esta llexislatura, y recordó a esti partíu que dirixentes de la so formación política en Baleares van reformar l’Estatutu d’esta autonomía.

Tocante a la llingua, IX-BA definen na so propuesta l’asturianu como la llingua propia d’Asturies y como cooficial xunto col castellán, reconociendo’l derechu del ciudadanu al usu de la llingua que-y ye propia. Los representantes de los dos grupos políticos que formen la coalición, manifestaron la so esperanza de que, tanto PSOE como PP, ‘sían racionales’ y ‘tengan col asturianu la mesma postura que tienen les sos formaciones polítiques con otres llingües autonómiques’.

Tamién te podria gustar