Iniciativa pol Asturianu fai un llamáu a la sociedá pa “moyase pola oficialidá” na manifestación d’esti vienres

Iniciativa pol Asturianu ve’l Día de les Lletres Asturianes como una fecha pa “sumar fuercies pa reclamar la oficialidá del asturianu nes cais d’Asturies” y recuerden que van tener presencia na cai asitiando un puestu informativu na plaza de La Escandalera d’Uviéu pa dar a conocer l’asociación a lo llargo del día y aprovechando pa facer dalguna aición complementaria (repartu de folletos, venta de material,…). Dende la orgnización faen un llamáu a la sociedá pa participar nesta reivindicación, organizada pola Xunta pola Defensa de la Llingua Asturiana y qu’albidren ye “perimportante pal futuru d’Asturies y de la so cultura”. Recuerden que nesti últimu añu la situación del idioma tuvo importantes problemes y qu’en dalgunos casos “esos problemes superáronse gracies al trabayu reivindicativu, lo que demuestra la importancia de participar nesti llabor”.

Iniciativa pol Asturianu va poner a disposición de toles persones interesaes una tirada llimitada de paragües col diseñu “Nun te mueyes col agua… muéyate pol asturianu” que van ponese a a la venta nel Día de les Lletres Asturiana y dientro del puestu que va ponese na Plaza La Escandalera, asina como na Manifestación pola oficialidá, al preciu de 10 euros pal públicu y 8 euros pa los socios de la organización. “Esti añu llueva o nun llueva, ¡nun hai escusa!”, recuerden.

Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial.

Espliquen qu’anque “ye verdá que la oficialidá nun ye una varina máxica que vaiga solucionar tolos problemes del idioma d’una vegada, pero sí ye imprescindible pa que’l procesu de recuperación del asturianu pueda llevase alantre”. Afirmen amás que “problemes como los surdíos esti añu nel campu educativu, nun sedríen talos si la llingua tuviera l’estatus d’oficialidá que merez”.