Iniciativa pol Asturianu crea agrupaciones llocales pa movilizar los conceyos

Iniciativa pol Asturianu vieno acabante crear agrupaciones llocales pa meyorar la so presencia nos conceyos, depués de celebrar esti sábadu pasáu la so Xunta Xeneral d’asociaos nun añu fundamental con una bona participación y una esbilla de propuestes de futuru.Iniciativa pol Asturianu celebró esti pasáu sábadu 2 d’avientu la so xunta añal d’asociaos, axuntando una bona asistencia y, sobre too, una gran participación de los socios y socies de la entidá. Y  d’ente les propuestes feches per parte de los miembros de l’asociación cabe destacar la creación d’una rede d’agrupaciones nos distintos conceyos d’Asturies, que va arrancar cola puesra en marcha de promotores n’Uviéu, Xixón y la Cuenca’l Nalón, ensin descartar la piesta en marcha d’otres, asina como d’estremaos planes de trabayu qu’averen a la sociedá asturiana la situación del idioma y sofiten el nuevu marcu nel que ta l’idioma tres los cambeos que tuvieron llugar esti añu y que ponen la oficialidá más cerca que nunca. Amás quier afitase y afondar na xera que yá fai la entidá desendolcando en conceyos asesores con empreses y políticos de toles estayes y sensiblidaes.

La xunta pesllóse cola aprobación de los presupuestos qu’amosó la bona xestión fecha y l’optimismu de tolo que puede algamase, con planes tamién de siguir medrando en númberu de socios y proyectos nuevos que van arrancar en 2018. El presidente de la entidá, Inaciu Galán, que s’enfrenta al so últimu añu como cabezaleru d’Iniciativa pol Asturianu valoró de forma mui positiva esta xunta xeneral: “Consiguimos nestos años afitar la organización de cara al futuru, aportar una forma nueva de trabayu y una cara más amable. Pa 2018 plantegámonos siguir medrando en númberu de socios, en presencia nes cais y en repercusión, tamos nun momemtu nel que cualesquier esfuerciu ye poco. Faigo un llamáu a toles persones esmolecíes pola situación del idioma, pa que se sumen a la organización y collaboren”