Iniciativa denuncia la poca sensibilidá del Presidente asturianu

Iniciativa pol Asturianu vieno acabante denunciar nel entamu del añu la falta de sensibilidá del presidente d’Asturies, Javier Fernández, pa cola llingua y la cultura asturianes. El xefe del executivu asturianu dio esti miércoles 31 el so Mensaxe de Fin d’Añu televisáu y fízolo ensin tener en cuenta qu’una parte importante de los ciudadanos a los que gobierna tienen por llingua propia l’asturianu.

Un añu más, Javier Fernández nun usó nin siquiera nun fragmentu l’asturianu. Usando’l castellán nos cinco minutos de mensaxe nun se refirió tampoco en nengún momentu a la situación del asturianu nin a la cultura asturiana en tol discursu.

Pa Iniciativa pol Asturianu “esti presidente dexa a les clares la so falta d’interés pa coles polítiques de promoción de la llingua asturiana y pa cola situación de la cultura asturiana, una importante seña d’identidá d’Asturies, amás d’un recursu económicu que xenera empléu pese a la poca atención que les polítiques autonómiques ponen sobre esta cuestión”.

Nel que ye l’últimu mensaxe d’esta llexislatura, Javier Fernández “decepcionó a los munchos asturianos, la mayoría según les encuestes, que pensamos que’l Gobiernu d’Asturies nun fai lo necesario pa evitar el desaniciu de la llingua asturiana”. Dende Iniciativa pol Asturianu dicen nun poder más que llamentar esti escaezu del asturianu y siguir trabayando pa que 2015 seya l’añu nel que consigamos un consensu a favor de la imprescindible oficialidá del asturianu, “al qu’esperemos que se sume’l presidente Javier Fernández”.