Inaciu Hevia Llavona faise col Fierro Botas por un ensayu sobre l’orixe de la botella de sidra

“La botella de Xixón. Oríxenes y desendolcu hestóricu de la botella de sidra d’Asturies” ye la obra ganadora del quintu premiu Fierro Botas, que concede’l Conceyu de Xixón al traviés de la Conceyalía d’Educación, Cultura, Mocedá y Fiestes. Ye esti un trabayu d’investigación al rodiu d’un elementu cimeru de la cultura asturiana, como ye la botella de sidra, sobre’l qu’hai pocos estudios fechos. El premiu dotáu con 4.000 € y la publicación del ensayu, foi pa la obra del etnógrafu Inaciu Hevia Llavona (Xixón, 1965), collaborador d’estremaes publicaciones especializaes onde tien asoleyaos dellos artículos, principalmente de tema hestóricu y etnográficu dende va más de 15 años.

El xuráu, qu’aconceyó’l pasáu xueves 29 de payares, taba formáu por Xosé Nel Riesgo Fernández, Direutor de la FMCEUP y Presidente del xuráu; Humberto Gonzali García, escritor y asesor del PP de Xixón; Roberto González-Quevedo González, Secretariu de l’Academia de la Llingua Asturiana; Jaime González Fierro-Botas, filólogu y representante de la familia Fierro Botas; Alberto Álvarez Peña, ganador de la edición anterior del Premiu Fierro Botas y MªXosé Rodríguez López, Responsable de la Oficina de Normalización Llingüística, que fizo de secretaria.

El premiu, concedíu por mayoría, quixo premiar lo novedoso del tema, rescamplando sobremanera la conxugación que l’autor fai ente’l patrimoniu cultural y etnográficu, la cultura popular y la industria; asina como l’apueste que fai por dar al mundu una mayor conocencia de Xixón y d’Asturies.