Gabino de Lorenzo enfréntase a la Fundación Príncipe pol allugamientu del muséu de Niemeyer

L’alcalde d’Uviéu Gabino de Lorenzo llanzó esti miércoles 1 dende diversos medios informativos ácides crítiques a los responsables de la Fundación Príncipe d’Asturies por mor de l’allugamientu del futuru muséu de la institución n’Avilés. El rexidor carbayón acusó a Graciano García y a los demás cabezaleros de la FPA de falta d’independencia y anunció una campaña de recoyida de firmes pa cambiar los planes del Principáu y ubicar el Muséu de los Premios na capital asturiana.

De Lorenzo truñó contra’l gobiernu autonómicu al qu’acusó de refugar Uviéu por otros llugares de la comunidá pa asitiar instituciones como la del Procurador Xeneral, el Conseyu Consultivu o el propiu campus universitariu de Mieres. La ubicación del muséu diseñáu pol arquitectu brasileiru Niemeyer n’Avilés ye pal alcalde uvieín “la gota que colma’l vasu” y “una agresión a la ciudá”.

En declaraciones a medios asturianos Gabino de Lorenzo afirmó que’l director de la Fundación Príncipe d’Asturies, el periodista Graciano García, prometiéra-y l’allugamientu del muséu n’Uviéu y contó que “mesmo m’enseñó unos planos onde s’asitiaba’l muséu na costera del Naranco”. El rexidor carbayón criticó duramente a García y a los responsables de la Fundación por “plegase a los dictaos políticos” del gobiernu de Vicente Álvarez Areces. A esti respective De Lorenzo dixo que los cabezaleros de la FPA “nun tán cumpliendo cola so obligación que nun ye otra que facer respetar la independencia de la fundación pa tomar les sos propies decisiones” y anunció xunto a la recoyida de firmes la intención de convocar una manifestación pol asitiamientu de la obra de Oscar Niemeyer n’Uviéu.