Foro entama l’Ágora col que quier aldericar sobre Asturies

Francisco Álvarez-Cascos, presidente de Foro Asturies, inauguró güei, a les 9.45 hores nel salón d’actos del Institutu de Salinas, l’Ágora de Foru, unos cursos de branu que na so primer xornada trataron sobre emprendimiento de la mano del profesor titular d’Estructura Económica na Universidá Autónoma de Madrid, David M. Rivas Infante, y de cuatro empresarios asturianos. Empobináu por Ignacio Onís, esti primer panel sobre emprendimiento va empezar coles Verdaes y falacias d’Economía esbillaes por David M. Rivas, a partir de les 10 hores. Va Ser el primeru de los seis que, hasta’l próximu 23 de xunetu, van averase a temes rellacionaes col derechu, la cultura, la comunicación, la universidá y el marketing.

Doctor n’Economía pola Universidá Autónoma de Madrid, David Manuel Rivas Infante (Xixón, 1957) realizó estudios de posgráu n’antropoloxía y socioloxía n’Estaos Xuníos ya Inglaterra y foi miembru en distintos conseyos asesores como’l de Mediu Ambiente d’España, el de Tresporte de la Comunidá de Madrid, de desenvolvimientu sostenible y desenvolvimientu rural de la Comisión Europea o del Observatoriu Llatinoamericanu d’Ordenación Territorial y Sostenibilidá.

A les 12 hores entamó la segunda y última mesa del día, ‘Vocación Entamadora’. Pelayo Fregadures, presidente de Juan Raspies, S. A., Inaciu Iglesias, presidente de Cartonajes Vir, José A. Martínez, presidente del Grupu Cook, y Jorge Fernández Álvarez, xerente de Mecanizados Pfi, S.L., van compartir colos asistentes les motivaciones, retos y desafíos nes sos respectives carreres profesionales.

L’asistencia a les ponencies ye gratuita pero por cuestiones d’aforu ye necesariu la reserva de plaza al traviés del corréu electrónicu secretarioagoradeforo.es, nes sedes de Foru o vía telefónica (985 20 27 45).

Mañana, xueves, va ser la vez del Derechu. El panel, so la dirección de Pablo Sánchez Lorda, va cuntar cola presencia de Jesús Bernal del Castillo, profesor titular de Derechu Penal na Universidá d’Uviéu, pa tratar, a partir de les 10 hores, la Diversión y nueves tecnoloxíes’.Dos hores dempués, l’abogáu Eduardo Estrada, profesor titular de Derechu Civil na Universidá d’Uviéu, va falar de ‘Derechu y Empresa’.

La cultura va llegar el vienres, día 18, con Emilio Marcos Vallaure, miembru de les reales academies de la Hestoria y de la Catalana de Belles Artes de San Jordi, y Alfredo Álvarez Menéndez, doctor en Filoloxía Hispánica, p’afondar sobre’l patrimoniu históricu asturianu.