Portada Sociedá Fina’l plazu pa participar nos Concursos de l’Academia de la Llingua

Fina’l plazu pa participar nos Concursos de l’Academia de la Llingua

by asturnet

La convocatoria de los concursos de l’Academia de la Llingua Asturiana concluye’l prósimu día 15 de xineru. La edición de 2007 d’estos concursos incluye les categoríes de Concursos d’Investigación, llectures pa rapazos, creación lliteraria “Premiu Llorienzu Novo Mier”, recoyida de material lliterario oral, concursu de teatru, concursu de recoyida de material lliterario escrito “Premiu Federico G.-Fierro Botas”, concursu de curtios cinematográficos.

La categoria de Concursos d’Investigación tien convocaos cuatro premios. El primer d’ellos ye la recoyida de material toponímicu, ensin asoleyar, qu’abarque la totalidá d’una parroquia, conxuntu de parroquies o Conceyu. Habrá un premiu d’Investigación llingüística, ensin asoleyar, que tenga aspectos llingüísticos o sociollingüísticos d’Asturies como oxetu del estudiu. Un premiu pa la recoyida oral de léxicu asturianu ensin asoleyar. Y un premiu pa un trabayu d’investigación sobre la lliteratura asturiana.

El premiu “Llorienzu Novo Mier” tien por enfotu la creación lliteraria, en prosa, n’asturianu. El Concursu empobináu pa les llectures pa rapazos tien por oxetu algamar una bona lliteratura pa les xeneraciones más nueves. El Concursu de recoyida material lliterario oral enfótase na realización d’un trabayu d’investigación que recueya la lliteratura non escrita. El Premiu “Federico G.-Fierro Botas”, de recoyida de material lliterario escrito, premia los trabayos de recompilación d’escritos n’asturianu enantes de 1970.
El Concursu de Teatru y el Concursu de Curtios Cinematográficos complementen la edición de 2007 d’estos Concursos de l’Academia, cola fin de difundir la llingua asturiana nos sos má estremaos ámbitos.

Los trabayos ganadores de cauna de les categoríes recibirán un premiu de 600€, cola escepción del Concursu de Curtios que recibirá 1.200€. Les decisiones del Xuráu van facese públiques nel Lletres Asturianes.

Academia de la Llingua Asturiana

Tamién te podria gustar