¿Falará’l Príncipe n’asturianu con motivu de los sos Premios?

Miembros de la xunta direutiva d’Iniciativa pol Asturianu aconceyaron con Teresa Sanjurjo, direutora de la Fundación Príncipe d’Asturies, nel llar de la institución organizadora de los Premios col mesmu nome, n’Uviéu. Nel conceyu, primer contautu ente dambes organizaciones, falóse de la situación sociollingüística d’Asturies, faciendo los representantes d’Iniciativa pol Asturianu delles propuestes concretes coles que la organización camienta que “la Fundación podría facer muncho pola normalización de la llingua asturiana y pol ameyoramientu del so prestixu social”. Ente elles la posibilidá de que’l Príncipe d’Asturies use l’asturianu nos sos discursos n’Asturies.

Ente les propuestes feches, l’usu del asturianu na páxina web, imaxe corporativa de la entidá, “como fai por exemplu la otra fundación del Príncipe, la Princep de Girona, que ye billingüe dafechu en toles sos actividaes”, amás del usu nes intervenciones del Príncipe d’Asturies nes sos visites a Asturies o del Presidente y la Directora de la Fundación. Los representantes de dambes entidaes coincidieron na importancia del asturianu como seña d’identidá. Sanjurjo esplicó a los miembros d’Iniciativa pol Asturianu “qu’esti ye un tema importante” y nel que “lleva tiempu pensando na cuestión del usu del asturianu per parte de la Fundación”. Esplicó que “va despacio pero quier facer les coses bien”.

Nos próximos díes Iniciativa pol Asturianu fadrá llegar a la Fundación una propuesta per escrito con delles acciones concretes coles qu’esperen que la institución pueda comprometese. Aguardando poder llegar a alcuerdos concretos que permitan que l’asturianu seya una llingua d’usu normal y visible per parte de la Fundación Príncipe d’Asturies.