Esti sábadu celebrase la I Ruta Interpretativa de l’Asociación pol Patrimoniu Históricu Industrial de Trubia

Esti sábadu celebrase la I Ruta Interpretativa de l’Asociación pol Patrimoniu Históricu Industrial de Trubia. La cita, titulada ““La llarga ponte de la hestoria. Un percorríu al traviés de les nueses pontes”, foi presentada esta selmana pol conceyal de Turismu, Alfredo García Quintana, y el presidente de la nueva asociación, el xeógrafu Toño Güerta.

La ruta, de calter gratuitu, va empezar a les 10:30 hores, dende la Ilesia Santa María de Trubia y nun ye necesaria inscripción previa. El conceyal de Turismu, Alfredo García Quintana, presentó la primer ruta interpretativa qu’entama esti mesmu sábadu la acabante constituyir Asociación pol Patrimoniu Históricu Industrial de Trubia (APHIT). Sol títulu “La llarga ponte de la hestoria. Un percorríu al traviés de les nueses pontes” esta iniciativa tien como oxetivu dar a conocer parte del estensu patrimoniu históricu de Trubia. Una actividá que, según destacó’l responsable de Turismu, va poner en valor “recurso turísticos d’Uviéu” que “hasta’l momentu nun s’esplotaron”.

El presidente de l’asociación, el xeógrafu Toño Güerta, esplicó que gracies a esta primer ruta van percorrese “les numberoses pontes qu’hai en Trubia, dende los más antiguos del sieglu XVI hasta los nacíos a raigañu del procesu industrializador; la idea ye destacar estos importante exemplos d’obra pública, el so significáu nel desenvolvimientu espacial de Trubia y el so valor patrimonial”.

Pa participar nesta actividá nun ye necesaria inscripción previa. Los interesaos tendrán de tar a les 10:30 hores frente a la ilesia parroquial de Santa María de Trubia y la ruta va rematar a les 13:00 hores en Piedrallasa (Trubia).