Esti llunes entamó’l procesu de votación pa escoyer nome a la entrada d’Uviéu pola “Y”

La vicealcaldesa, Ana Taboada y representantes de la plataforma ciudadana “Imaxina un Bulevar” presentaron  los 52 nomes pa la cai, escoyíos polos ciudadanos y ciudadanes, y validaos en comisión.

La vicealcaldesa y conceyala de Participación ya Información, Ana Taboada presentó nuna rueda de prensa’l llistáu de los 52 nomes ente los que, a partir d’esti  llunes, tantu de manera presencial al traviés de casi una ventena de meses de participación, con urnes instalaes en dellos puntos de la ciudá y on line, al traviés de la web www.oviedoparticipa.es, los ciudadanos van poder escoyer la denominación pa la entrada a Uviéu pola antigua A-66.

En nome de la Plataforma “Imaxina un Bulevar”, Xosé Bermello destacó’l trabayosu llabor que supunxo la validación de les 52 denominaciones, ente un total inicial de 1.189. Y tamién animó a los ciudadanos y ciudadanes a participar, colos sos votos, en dar un nome pa la entrada a la ciudá pola “Y”.

Dende’l pasáu 18 de xineru, los  ciudadanos y ciudadanes empadronaos nel conceyu d’Uviéu y mayores de 12 años pudieron proponer hasta trés nomes pa nomar la vía d’accesu a Uviéu pola antigua A-66, gracies a un procesu impulsáu poles conceyalíes d’Información y Participación y Urbanismu en collaboración cola plataforma ciudadana ‘Imaxina un Bulevar’.

Les propuestes fixéronse vía telemática, al traviés de la páxina web www.oviedoparticipa.es o presencialmente, rellenando un formulariu y depositándolo nes urnes instalaes en distintos espacios públicos de la ciudá. Los menores de 12 años, participaron de forma presencial axuntando la correspondiente autorización. Darréu, una comisión de validación estudió y esanició de les propuestes recibíes  aquellos nomes que frayaben derechos fundamentales o teníen calter xenófobu o racista. Otros requisitos  a cumplir yeren que non se tátara de nomes de persones, que destacaren valores cívicos universalmente reconocíos  o reconocieren traces identitarios que confirieren una personalidá propia al llugar y que resalten el trabayu, la participación y el protagonismu de la coleutividá qu’inspiren el proyectu “Imaxina un Bulevar” .

LLISTÁU NOMES BULEVAR.doc ( doc , 130,50 Kb )
MESES DE VOTACION DE NOMES.pdf ( pdf , 70,07 Kb )
Audiu RP Propuestes Bulevar.MP3 ( mp3 , 26.404,08 Kb )