Entamen un cursu de llingua y cultura del Navia-Eo en Tapia

El Conceyu de Tapia, en collaboración cola Fundación Parque Histórico del Navia, entama l’IV Cursu de Lingua y Cultura del Navia-Eo. Los llunes, miércoles y xueves ente’l 10 d’avientu de 2012 y hasta el 17 de xineru de 2013, ente los cinco y los ocho de la tarde impartiráse la cuarta edición del Cursu de Llingua y Cultura del Navia-Eo na sala Marie Curie de la Casa de Cultura tapiega.

Mientres el Cursu, d’alfabetización en gallego-asturianu que sigue a les ediciones de 2008, 2010 y 2011, van impartise tamién clases y ponencies sobre distintes materies rellacionaes col territoriu Navia-Eo, como la lliteratura y sociollingüística del gallego-asturianu, esperiencies de normalización llingüística, el gallego-asturianu na música, recursos naturales del Navia-Eo, mitoloxía, lliteratura infantil y esperiencies docentes col gallego-asturianu, oficios tradicionales…

Pa ello, esti cursu va cuntar cola participación de profesores especializaos en delles d’estes árees y distintes ponentes que van dir, a midida que el cursu avance, presentando les distintes temátiques que nél s’impartirán, como Xosé Miguel Suárez, Tapia; Marta Trevín, Ricardo Saavedra o Iván Iglesias Fernández.

La inscripción nesti cursu cofinanciáu pola Conseyería d’Educación, Cultura y Deporte y el el Conceyu de Tapia, gratuitu y de places llendaes, ha facese hasta’l próximu 10 d’avientu de 2012 nel teléfonu 985.624.821 (Iván Iglesias) o unviando un corréu lletrónicu a la dirección cultural@parquehistorico.org