Entamen un cursu d’afondamientu llingüísticu n’Uviéu

La Xunta pola Defensa de la Llingua Asturiana organiza un cursu d’afondamientu llingüísticu pa persones adultes de 40 hores de duración, nel que los los alumnos y alumnes van poder afondar nel bon usu del idioma tanto a nivel escritu como oral, asina como nes relaciones ente llingua y sociedá. Les clases van escomenzar el llunes 8 d’abril, nel local de la organización: Conceyu Abiertu, na cai La Gascona 12, baxu A, d’Uviéu, y n’horariu de 19’00 a 21’00 hores, los llunes y miércoles (horariu provisional hasta concretar y consensuar cola xente matriculao).

El preciu de la matrícula completa ye de 30 euros y pa inscribise nun ye necesaria nenguna titulación o profesión concreta. Sicasí, encamiéntase a les persones que se vayan matricular, que tengan una conocencia básica de la espresión escrita y oral del idioma.

Toles persones interesaes pueden apuntase llamando al 985 22 95 53 o al 645 97 86 60, o bien mandando un mail a la direición: info@exunta.org

Amás, la Xunta pola Defensa de la Llingua Asturiana ye entidá organizadora d’actividaes de formación permanente del profesoráu, poro, esti cursu proporciona creitos homologaos de formación al profesoráu de Primaria y Secundaria a quién lu realice con aprovechamientu.