Entamaron les Xornaes Internacionales d’Estudiu de l’ALLA que van desenvolvese hasta’l xueves

Les XXXIV Xornaes Internacionales d’Estudiu tan celebrándose yá como cada añu nel salón d’actos de la Facultá de Filosofía y Lletres onde tuvo llugar la so inauguración esti martes 7 a les 12 hores cola presentación dela edición dixital del “Lletres Asturianes 117” y el nuevu númberu de la revista dixital “Ciencies. Cartafueyos de Ciencia y Teunoloxía 7”.

La inauguración esti martes 7 sirvió pa facer alcordanza de lo averada que s’alcuentra nestos dies la posibilidá de llograr la oficialidá. L’entamu de les xornaes cuntó a les 12 hores cola participación del Vicerrector d’Investigación na presentación de dos espublizaciones de l’Academia de la Llingua Asturiana, la edición dixital del “Lletres Asturianes 117” y el nuevu númberu de la revista dixital “Ciencies. Cartafueyos de Ciencia y Teunoloxía 7”, dixirida por Carlos Lastra.

Tres de la presentación entamaron les xornaes propiamente diches cola participación del académicu Francisco Llera Ramo (Universidá del País Vascu) que va facer la presentación en sociedá de la III Encuesta Sociolingüística de Asturias.

A les 16 hores pronunció Franck Floricic (Universidá Sorbonne Nouvelle-París) la ponencia “La negación en asturiano: comparación con otros idiomas románicos” y darréu diose llectura a les comunicaciones del día: Severino Antuña González faló de la “Evolución de los estudios de toponimia centraos n’El Valle La Güeria Carrocera”;  Vicente Rodríguez Hevia de “La producción oral d ’Aurelín, el caberu poeta mineru”; Pablo Suárez García de “La interferencia léxica castellana nel asturianu normativu”; l’actor Carlos Alba «Cellero» de “Oralidá escénica: condicionantes prosódicos y sociollingüísticos”; y Rosabel San Segundo Cachero d’una “Ferramienta nuevo pa testos medievales”.

La Xornada finó a les 18,45 hores con una conferencia del profesor  Juan José García González (Universidá d’Uviéu) sobro “La epigrafía romana del dominiu llingüísticu ástur: una revisión”.

Esti miércoles 8, nel salón d’actos del edificiu alministrativu (1ª planta) de la Facultá de Filosofía y Lletres de la Universidá d’Uviéu, celébrase la segunda sesión de les XXXVI Xornaes Internacionales d’Estudiu entamaes por esta Academia.

Les sesiones d’esta tarde entamarán a les 16:00 hores cola ponencia de la profesora Sonia Barnes, de la Universidá de Marquette (USA), titulada «Un análisis acústico de la metafonía asturiana». Darréu, la sesión continuará coles comunicaciones de Florencio Friera, Xosé Nel Comba Paz, Xuan Xosé Lajo y Carmen Muñiz Cachón (Universidá d’Uviéu y ALLA).

La xornada pesllaráse cola ponencia «¡Bable nes escueles! Averamientu hestórico-políticu a la vindicación de la escolarización de la llingua asturiana», del profesor Marcos Rodríguez Álvarez de la Universidá d’Uviéu.