El turismu medró n’Asturies l’añu pasáu pesie a la crisis

El territoriu d’Asturies recibió a lo llargo de 2010 más d’1.825.000 turistes, una cifra que supera nun 1,2% la rexistrada en 2009 y que pon al país en valores mui asemeyaos, llixeramente superiores, a los de 2008, dempués de la baxada de 2009. Estos son los datos algamaos nel piesllu del añu turísticu, dempués de que l’Institutu Nacional d’Estadística ficiera públicos los datos d’establecimientos estrahoteleros del mes d’avientu.

Según esti estudiu estadísticu, nun solo medró’l númberu de turistes sinón que les pernoctaciones en tolos establecimientos asturianos superaron les 4.575.000, con un incrementu del 2% en rellación a 2009 y del 1,2% en comparanza col añu 2008. La estancia media tamién aumenta llixeramente y supera los 2,5 díes por visitante, siempre falando del global d’establecimientos (hoteles, turismu rural, cámpines y apartamentos).

Ensin dulda, el gran obleru del añu foi’l crecimientu del turismu internacional, ún de los principales retos que tien el sector n’Asturies. Nesti sen, los datos del INE señalen que’l númberu de visitantes foriatos aumentó en 2010 cerca d’un 18% en rellación a 2009, el mayor incrementu rexistráu ente les comunidaes autónomes del norte peninsular.

Amás, les pernoctaciones internacionales nel añu 2010 tamién amuesen un crecimientu del 17%. Tanto l’incrementu del númberu de turistes como’l de les pernoctaciones de los viaxeros internacionales asitien a Asturies a la cabeza no que cinca a crecimientu del añu 2010, hasta per delantre de Galicia en plenu añu Xacobéu.

Por procedencia, hai que señalar que’l turismu internacional supón yá’l 12,3% del total del turismu n’Asturies. Amás, cerca d’un 20% de los visitantes lleguen de Madrid, un 10% de Castiella y Lleón, un 8% del País Vascu, una cifra igual a la de Galicia, y cerca d’un 6% de Cataluña.

Llideralgu en turismu rural

Amás de la situación global positiva, los datos fechos públicos güei pela mañana pol INE espeyen la importancia del turismu rural pal sector n’Asturies. Nesti sen, destaca que la cuota de pernoctaciones del turismu rural d’Asturies dientro de les comunidaes de la cornisa cantábrica s’afíta perriba del 36% y caltiénse en posición de llideralgu al final del 2010. Asturies, en turismu rural, ye la comunidá que más crecimientu esperimenta dientro d’esta fastera en rellación a los dos años últimos, con un 18,23%. El númberu de turistes pel 2010 tamién se vio reforciáu con un incrementu de cerca del 20% en rellación al 2008.

Per otru llau, el turismu rural d’Asturies presenta una estancia media de cuasi cuatro nueches (3,8), siendo la comunidá que más crez nesti aspeutu. Too esto supunxo que se superen nel acumuláu añal les cifres del 2007, calificáu como históricu pol sector. Amás, Asturies colócase en turismu rural en valores de crecimientu mui positivos, yá que crez un 9,2% en turistes y un 5% en pernoctaciones.