El tenista mallorquín Rafael Nadal gana’l Premiu Príncipe d’Asturies de los Deportes 2008

El númberu unu del tenis mundial, el mallorquín Rafa Nadal ta acabante de facese col Premiu Príncipe d’Asturies de los Deportes 2008, pal que competía cola selección española de fútbol, el campeón olímpicu de natación, Michael Phelps, la récor mundial femenín de saltu con pértiga, Yelena Isinbayeva, y l’atleta más rápidu del mundu, el xamaicanu Usain Bolt.

Cuasi una trentena de candidatures de 19 nacionalidaes optaben al Premiu, séptimu de los ocho galardones internacionales que convoca añalmente la Fundación Príncipe d’Asturies, y qu’esti añu algamen la so XXVIII edición.

El Premiu ta dotáu con 50.000 euros, la escultura creada y donada espresamente por Joan Miró pa estos galardones, un diploma y un insinia acreditativos.

El Xuráu del Premiu del Deporte ta formáu por Rogelio Blanco, José María Casanovas, Enrique Castro, Quini, María Escario, Misael Fernández Porrón, Antonio Galeano, Julián García Candau, Eduardo Inda Arriaga, Luis Infante, María del Carmen Izquierdo, Jaime Lissavetzky Díez, Javier Muñoz Gallego, Santiago Nolla Zayas, José Ramón Pindado, Matías Prats, Nemesio Rodríguez López, Juan Antonio Samaranch, Arantxa Sánchez Vicario, José Javier Santos, Alejandro Sopeña, Javier Tola Figueruelo, José Luis Vilaseca i Guasch, Emma Villacieros, Juan Yeregui y Ignacio Martínez, que ye’l secretariu del mesmu.