El Seminariu de Filoloxía Asturiana prepara’l congresu «Ciencia, llingua y fronteres»

El grupu d’investigación Seminariu de Filoloxía Asturiana de la Universidá d’Uviéu entama un congresu que, baxo’l títulu xenéricu «Ciencia, llingua y fronteres», va celebrase los díes 5 y 6 d’ochobre del 2010 na Facultá de Filoloxía de la capital asturiana. Nel alcuentru que se ta organizando, el Seminariu quier buscar soluciones “al problema de clasificar y tipificar la diversidá llingüística mundial, la realidá multiforme del llinguaxe como atributu biolóxicu de la especie humana”.

Nel Congresu van presentase dellos estudios novedosos que “miden les fronteres llingüístiques al traviés d’unidaes matemátiques” y van plantegase cuestiones tales como “¿Tien sentíu’l conceptu de llingua (o dialectu)? Si tien sentíu, ¿de qué naturaleza son los criterios manexaos?” o “¿Cómo se conciben les fronteres ente llingües (o ente dialectos)?”.

Nesti alderique van participar especialistes en Llingüística Xeneral, en Romanística, en Dialectoloxía Hispánica y Dialectoloxía Asturlleonesa, asturianos, d’otres zones del Estáu, y europeos. Sicasí, el Congresu va dexar espacios pa la Filosofía del Llinguaxe, l’Antropoloxía o la Bioloxía, disciplines que, según comenten dende’l Seminariu, “comparten delles de les esmoliciones alredor del conceptu de tipu y frontera”.

Nel Comité Organizador tán Ramón d’Andrés Díaz (presidente), Profesor Titular de la Universidá d’Uviéu; Taresa Fernández Lorences (secretaria), Profesora de la Universidá d’Uviéu, Xulio Viejo Fernández (vocal), Profesor Titular de la Universidá d’Uviéu; Fernando Álvarez-Balbuena García (vocal), Profesor de la Universidá d’Uviéu y María Cueto Fernández (vocal), Becaria Pre-Doctoral FICYT, Universidá d’Uviéu.

Amás, el Comité Científicu cunta con Hans Goebl (O. Univ. Prof. de Romanística, Universidá de Salzburgo, Austria), Joan Veny i Clar (Catedráticu Eméritu de Filoloxía Catalana, Universidá de Barcelona, Institut d’Estudis Catalans); José Ramón Fernández González (Catedráticu de Filoloxía Románica, Universidá d’Uviéu); Antonio Vespertino Rodríguez Rodríguez (Catedráticu de Filoloxía Románica, Universidá d’Uviéu); José Antonio Martínez García (Catedráticu de Llingua Española, Universidá d’Uviéu) y Enrique del Teso Martín (Decanu de la Facultá de Filoloxía, Universidá d’Uviéu).