El proyectu ‘Xuniendo Cultures’ busca una mayor participación de la población inmigrante nos centros sociales

La conceyala d’Inmigración, Marisa Ponga, presentó la selmana pasada’l proyectu ‘Xuniendo Cultures’ que tien como oxetivu dar a conocer otres cultures y fomentar la integración social de la población inmigrante residente nel conceyu. Del 20 de mayu al 1 de xunu van desenvolvse  seis talleres de cocina, música, danza y pintura de distintes cultures.

La conceyala tuvo acompañada por representantes de les asociaciones Asturies Llatina, ARPA (Asociación de Peruanos Residentes n’Asturies), ASIA (Asociación de Senegaleses pola Integración d’Asturies) y l’Asociación pola Solidaridá y l’Esperanza de los Senegaleses n’Asturies.

Ponga indicó qu’esti proyectu tien dellos oxetivos: collaborar nel amenorgamientu de los prexuicios, promover la participación social y cultural de los inmigrantes, faer posible l’acercamientu de la cultura d’estos países, favorecer el contactu ente les distintes nacionalidaes y crear un ambiente de participación ente les distintes asociaciones.

Esti programa enmárcase dientro del oxetivu global de la Conceyalía de dar un entornu a les actividaes que se desenvuelven nos centros sociales que, d’acordies con Ponga, tienen de beneficiar la integración de les distintes cultures y xeneraciones.