El Principáu edita ‘in extremis’ cartelos y programes n’asturianu del 8 de Setiembre pa los actos de Mieres

L’asturianu tará presente na propaganda institucional del Día d’Asturies de forma parcial y sólo depués d’un arreglu d’última hora. El Gobiernu autonómicu ta acabante editar n’esi idioma cartelos y programes de les actividaes del 8 de setiembre en Mieres, mientres la promoción de los actos institucionales de mañana mantiénse dafechu en castellán. Una quexa de la Oficina de Política Llingüística propició la igua ‘in extremis’.

La selmana pasada, en viéspores de les cellebraciones y diez díes depués d’una primer presentación en Xixón de los actos del 8 de setiembre con publicidá sólo en castellán, el director de la Oficina, Ramón D’Andrés, elevó un escritu a los sos superiores de la Conseyería de Cultura, Comunicación Social y Turismu nel qu’avisaba del ‘escaezu’ institucional y alertaba de qu’esi olvidu “dexaba en mal llugar” el compromisu’l Gobiernu cola promoción y normalización del asturianu.

Hores depués, l’Executivu autonómicu encamentó-y a la Oficina de Política Llingüística la torna al asturianu de la propaganda de los actos del día 8, y la propia conseyera, la socialista Ana Rosa Migoya, anunció la presencia de la llingua asturiana na publicidá editada pol Gobiernu. Los cartelos y programes tán acabante salir de la imprenta.

Magar d’esa igua parcial, que mantién dafechu en castellán les invitaciones pal actu solemne nel que mañana s’entregarán les Medalles d’Asturies, dos de los tres partíos qu’integren la coalición que gobierna’l Principáu, Izquierda Xunida y Bloque por Asturies, afondaron güei el so distanciamientu de les cellebraciones oficiales ya insistieron na necesidá de que l’asturianu tenga una mayor presencia institucional.

Asina, mientres Izquierda Xunida llamó güei a “influyir nel Gobiernu, empobinándolu p’hacia posiciones muncho más identificaes cola llingua” y reivindicó la inclusión de la coficialidá na inminente reforma del Estatutu d’Autonomía, el Bloque por Asturies faló abiertamente d’escaezu “sistemáticu” de la llingua asturiana nel Executivu autonómicu. Dambes formaciones cellebrarán el 8 se Setiembre nel parque Los Pericones de Xixón.

La presencia del asturianu nel 8 de Setiembre divide a los tres partíos que gobiernen el Principáu