El Plenu uvieín da’l vistu bonu definitivu a la Ordenanza de Tresparencia

El Plenu del Conceyu d’Uviéu dio esti miércoles el vistu bonu a l’aprobación definitiva de la Ordenanza Municipal de Tresparencia, Accesu a la Información y Reutilización.

La vicealcaldesa y conceyala de Participación, Ana Taboada, responsable d’esta Ordenanza, empezó la so  intervención estimando les aportaciones efectuaes por tolos Grupos, los servicios xurídicos del Conceyu y los ciudadanos porque lu ficieron “más completa y meyor”. Amás, la conceyala de Somos amosóse confiada en qu’esta Ordenanza va ser “precursora nel Estáu español” y va dexar “avanzar escontra la tresparencia”. Taboada sorrayó “el diálogu y la collaboración como clave pal entendimientu mutuu” ente les alministraciones y los ciudadanos y comprometióse a siguir trabayando pa llograr un cogobierno efectivu.

A lo último, la vicealcaldesa encamentó a tolos Grupos a que por cuenta de la celebración el próximu día 5 del Día Internacional de los Datos Abiertos, “empecemos a funcionar pa que esos datos puedan ser abiertos a la ciudadanía, como comprometimos toos con esta Ordenanza”.

Pela so parte, la conceyala popular Cuadonga Díaz, adelantró’l votu favorable del so Grupu, “por un exerciciu de responsabilidá” y porque, recordó, el Gobiernu presidíu pol PP siempres actuó “en favor de la tresparencia y del accesu de los ciudadanos a la información”. Nesti sentíu, amestó que’l Conceyu d’Uviéu llograra, mientres los mandatos populares, una puntuación de 100 sobre 100 nel ranking de Tresparencia Internacional.

Dende’l PP, el so voceru axuntu, Gerardo Antuña, defendió una moción na que se defendía que los ciudadanos puedan aportar a los Plenos portando pancartes reivindicatives. N’opinión del popular, esti alderique amenóse porque na sesión anterior sesión plenaria la Policía Local retiró una serie de pancartes, “un fechu que nun s’esplicó entá o non de forma fayadiza”. Antuña recordó que mientres los mandatos del PP los vecinos podíen portar pancartes y amosó delles fotografíes pa demostralo. “Acallantar la crítica nun fai bona una acción de Gobiernu”, sentenció.

Dende Ciudadanos, el so voceru, Luis Zaragoza, amosóse a favor de la propuesta, “pero tamién a favor del orde” y aprovechó la so intervención pa reclamar al alcalde, Wenceslao López, qu’abra una vez d’entrugues nel Plenu por que los ciudadanos presentes puedan dirixise a la Corporación.

Tolos Grupos qu’integren l’equipu de Gobiernu votaron en contra de la propuesta popular y reprocharon a los populares que defendan la llibertá d’espresión n’Uviéu cuando’l Gobiernu central punxo en marcha la conocida como ‘Llei mordaza’.