El Muséu Olímpicu de Lausanne va cede-y parte de la so colección a la Fundación Príncipe d’Asturies

Representantes de la Fundación Príncipe d’Asturies caltuvieron el pasáu 7 d’ochobre un alcuentru colos responsables del Muséu Olímpicu de Lausanne col oxetu d’organizar una amuesa dientro los actos comemorativos del venticinco aniversariu de la institución cultural.

El Muséu Olímpicu va ceder temporalmente una parte representativa de la so colección, qu’ inclúi medalles, antorches, fotografíes y recuerdos de deportistes que nunca salieron de les sos sales. Amás, la esposición va contar cola antorcha de los Xuegos Olímpicos de Barcelona’92, y equipamientos deportivos que pertenecieron a deportistes como Jesse Owens y a dalgunos de los galardonaos col Premiu Príncipe d’Asturies de los Deportes.