El Muséu Arqueolóxicu d’Uviéu acueye unes Xornaes sobre la construcción sociocultural de la moda y la belleza

Dende esti miércoles 16 d’Ochobre y hasta mañana vienres 18, vienen desendolcándose nel Muséu Arquolóxicu d’Asturies, n’Uviéu les Primeres Xornaes Deméter que, entamaes pola Asociación Asturiana d’historia de les Muyeres, averase a “La Construcción sociocultural de la moda y la belleza” con una entruga retórica como llamamientu: “¿Qué hay de malo en querer ser bella?”.

Les xornaes entamaron el miércoles con una conferencia inaugural pela mañana al cargu de la profesora de filoloxía angloxermánica de la Universidá d’Uviéu Socorro Suárez Lafuente y una mesa coloquiu sobre los “Cuerpos escritos: modelos femeninos en la literatura” na que participaron les doctores Alba González Sanz, Elena Igartuburu García y Carmen Suárez Suárez.

Esti miércoles pela tarde, tres de la proyeición del documental “Miss Escaparate”, tuvo llugar otra mesa-coloquiu sobre “Cánones y estética femenina a través del arte” na qu’intervinieron Susana Carro Fernández, Carmen González García y Eduardo Viñuela Suárez.

Güei xueves la xornada entamó a les 10,30 hores con dos meses-coloquiu. Una sobre “La mujer ideal: discursos de la belleza femenina en la historia” al cargu de Carla Rubiera Cancelas, Silvia MedinaQuintana, Mónica González Santana y Rosa María Cid López; y la otra sobre “La estética del Derecho” que cuntó cola participación de Carmen Carracedo Falagán, Paula Bartolomé Ovejero, Ana Suárez González y María Valvidares Suárez.

Les xornaes finen esti vienres con una mesa-coloquiu qu’entama a les 10,30 hores sobre “El valor de la belleza” na qu’intervienen María Fernández Campomanes, Alejandra Moreno älvarez y Rosario Hernández Catalán. Darréu d’ella fadrase una visita guiada pol Muséu Arqueolóxicu al cargu de Laura Bécares Rodríguez.