El Garrapiellu fala de “parálisis” del Conceyu Abiertu pola Oficialidá (CAO) na so Memoria d’Actividaes 08-09

L’Asociación Cultural “El Garrapiellu” fizo pública estos díes la so Memoria d’Actividaes 2008-2009. Un documentu nel que faen analís de les sos actividaes a lo llargo de los dos años últimos, faciendo “necesaria autocrítica” en delles cuestiones. Ún de los temes esaminaos nel mesmu tien que ver coles sos rellaciones con asociaciones como’l Conceyu Abiertu pola Oficialidá (CAO).

Nel documentu, l’asociación xixonesa llamenta’l rechazu per parte del CAO d’un documentu presentáu por Sixto Armán, en representación d’El Garrapiellu, nel que se facía “autocrítica de la parálisis a la que nos taba llevando la dinámica seguía hasta’l momentu proponiendo llínees alternatives de trabayu p’abrir la xestión de la Plataforma a les asociaciones participantes y democratizando’l funcionamientu de la mesma pa involucrar la másima cantidá de xente”. Una propuesta, que recuerden, “foi rechazada pol C.A.O.”, lo que foi pa l’asocación “una desilusión” pa con esta organización.

Ente los llogros que destaquen nestos tiempos últimos tán les escursiones culturales, concursos lliterarios, cursos de deportes tradicionales… Recordando sicasí, les dificultaes organizatives que viven, anque comenten, “ye cierto y tristemente palpable’l momentu de parálisis que vive’l mundiu sociu-cultural asturianista”. Sicasí, conscientes “de qu’anguaño ye precisamente nel asociacionismu onde vive de modu más intensu la brega pola defensa de la cultura asturiana”, ven necesario “siguir nel camín”.

El Garrapiellu recuerda, no que cinca a la prensa, “que ye bien triste comprobar día a día ensin enquivocase nos pronósticos cómo cualquier escritu unviáu n’asturianu queda perdíu y non apaez espublizáu enxamás”, cuando, pudieron comprobar “que les dos cartes y un comunicáu que sí se enviaron a la prensa en castellano apaecieron publicaos rápido y ensin torgues”.

El Garrapiellu tien como principal oxetivu pal próximu cursu d’actividaes, la celebración del venti aniversariu de la organización “cola máxima notoriedá”, amás de “trabayar no posible cola Alministración amás d’escontra d’ella cuando seya necesario”, presentando “un documentu de propuestes pa ser presentáu a la Conceyalía de Cultura del Ayuntamientu de Xixón y a los grupos políticos con representación municipal, amás de la Conseyería de Cultura del Principáu d’Asturies”.

Memoria d’Actividaes 2008-2009 d’El Garrapiellu