Portada Sociedá El funeral por Ramos Corrada sedrá na Ilesia San Xulián de Somió

El funeral por Ramos Corrada sedrá na Ilesia San Xulián de Somió

by asturnet

Tres d’una llarga enfermedá, esti martes 20 d’agostu morría’l Vicepresidente de l’Academia de la Llingua Asturiana, Miguel Ramos Corrada, ún de los mayores expertos na lliteratura contemporánea asturiana y sobremanera na nuesa llingua.

Miguel Ramos Corrada, que nació en 1949, foi Presidente d’esta Institución ente los años 2000 y 2001 y anguaño ocupaba’l cargu de Vicepresidente. Yera direutor de les coleiciones lliteraries «Llibrería Académica» y «Mázcara» y miembru del Conseyu de Redaición de les revistes «Lliteratura» y «Lletres Asturianes».

Los sos trabayos y aportaciones sobre la lliteratura asturiana foron y son referencia d’esta materia pa investigadores y estudiosos en tol mundu. Un exemplu d’esti facer ye la Historia de la Lliteratura Asturiana, obra fundamental pa la conocencia de los nuesos escritores, de la que’l Profesor Ramos foi coordinador y el so principal afalador.

Xunto al so llabor investigador, amuesa de rigor y honestidá, Ramos Corrada tenía un compromisu firme colos sos ideales sociales, sigún asoleyaba güei l’Academia de la Llingua nun comunicáu, “con una militancia clara yá dende la so mocedá na defensa de los valores democráticos y na llucha por una enseñanza pública y al algame de toos, y onde la cultura y la llingua d’Asturies ocupen un llugar cimeru”. Al empar del trabayu institucional na Academia, tamién llevó alantre una llarga xera docente ya investigadora na direición n’Asturies de la Universidad Nacional de Educación a Distancia (UNED) y darréu na Universidá d’Uviéu. Pala Academia dela Llingua “foi esti llabor un exemplu de dedicación y entrega, enllenu d’un espíritu constructivu, onde’l diálogu y el respetu pa con aquellos que nun compartíen les sos idees yera la norma nel so facer”.

El funeral pola so alma va tener llugar mañana, na ilesia de San Xulián (Somió), a les 17.30 hores.

Tamién te podria gustar