El día 11 ábrese’l plazu d’inscripción nos centros sociales d’Uviéu

La conceyala d’Atención a les Persones, Marisa Ponga, presenta la nueva programación de la que vamos poder esfrutar a partir d’ochobre. La ufierta inclúi talleres “d’ociu, tiempu llibre, ocupacionales, preventivos, deportivos, de caltenimientu y terapéuticos”.

La conceyala d’Atención a les Persones, Marisa Ponga, presentó esta selmana la nueva programación que van ufiertar los centros sociales del conceyu d’Uviéu a partir d’ochobre. Según resaltó la edil, les actividaes diseñáronse coles mires de “fomentar la participación y l’integración social de los colectivos ciudadanos” polo que s’ufierta un ampliu abanicu de talleres “d’ociu, tiempu llibre, ocupacionales, preventivos, deportivos, de caltenimientu ya inclusive terapéuticos”.

Ente la ufierta de calter gratuitu estremóse ente talleres artísticos (cestería, talleres de cueru… que sobretou s’ufiertarán nos centros de la zona rural), espresión corporal (baille de salón, sevillanes… )  artes escéniques (teatru y coru), cordures tradicionales, actividaes de caltenimientu (bailoterapia, body balance, runfa y pilates) y nueves tecnoloxíes. Según resaltó la conceyala, esta última formación va ufiertase tantu en VillaMagdalena (pa mayores de 50 años) como nel centru xuvenil de La Corredoria (pa mozos menores de 35 años). En dambos escenarios ufiertarán cursos de 20 hores de duración de temes básiques nel día ente día de la sociedá de la información” como pueden ser les redes sociales, la firma electrónica, Internet o Word.

Dientro d’esta llicitación, diseñáronse otra serie de cursos,  que al ser más especializaos “yá que riquen monitores y recursos específicos” van tener un costu d’unos 20 euros al mes. Ente ellos destaquen talleres tan demandaos como los de cata de vinu, danza del banduyu y de dibuxu y pintura.

La conceyala siguió recordando que, amás de esta ufierta, y al traviés del contratu de dinamización sociocomuñal que supon tener 15 dinamizadores pa esti nuevu periodu formativu qu’empieza na seronda, programáronse otros paquetes d’actividaes rellacionaos cola estimulación cognitiva, acciones d’espresión artística y talleres infantiles.  Amás, la responsable de la área de Centros Sociales indicó qu’en curtiu podrá anunciase les 20 rutes senderistas per fora d’Uviéu de les que van poder esfrutar los mayores de 55 años mientres seronda y primavera. El plazu d’inscripción pa los talleres especializaos va abrise’l día 11 de setiembre, pal restu d’actividaes, el día 15. En dambos casos va tener hasta la xornada del 25 de setiembre pa podese apuntar.