El Conceyu d’El Franco llama a los sos habitantes a vistise con traxes andaluces

El Conceyu d’El Franco organiza la primer edición de la “Feria de Andalucía”, un eventu col que quieren “da-y un toque d’esi coloríu y allegría especial del sur al occidente d’Asturies”. Pa ello, el Conceyu va fomentar el consumu de productos andaluces y anima a los chigres a decorase con motivos d’esti país del sur de la península.

Lo más llamativo ye quiciabes la convocatoria d’un “Concurso de Trajes Andaluces”, pa homes, muyeres y neños, “pa incentivar que la xente s’involucre tovía más”, espliquen dende la Conceyalía dirixida pola socialista Geli Iglesias, que na información unviada los medios pide a los ciudadanos que s’animen “a sacar los sos traxes de llunares o a diseñalos de la forma mas orixinal”.

La 1er Feria d’Andalucía va celebrase n’A Caridá esti 18 de mayu, con talleres de flamencu, abanicos y espaciu pa les persones que quieran averase a la feria a caballu.