El Conceyu de Xixón, pioneru con Impulsa en Compra Pública d’Innovación

IMPULSA llanza una Consulta Preliminar al Mercáu al envís de cuntar cola retroalimentación d’actores comenenciudos que dexe verificar la viabilidá, l’algame y característiques tecnolóxiques apropiaes d’una Ferramienta d’Analís Intelixente de Datos (HAID IMPULSA).

Esta Consulta ye’l pasu previu a la preparación d’un procesu de Compra Pública d’Innovación para l’alquisición de dicha ferramienta, que, tendrá de faer accesible información proveniente de diverses fontes de datos n’abiertu para la ciudadanía y les empreses, col fin d’alcontrar les fortaleces de la ciudá, superar les debilidaes y a partir de los datos llograos, les empreses puedan desenvolver la so actividá d’una forma más eficiente. D’esta miente, el conxuntu de la ciudá va poder disponer d’una Ferramienta que va fortalecer aquellos sectores qu’apurren mayor valor añedíu y por tantu van ameyorar les mires de crecedera económica de la ciudá.

El plazu para unviar el cuestionariu d’esta Consulta al Mercáu va ser de dos meses que van empezar a cuntar dende’l día darréu posterior a la publicación del anunciu de Consulta Preliminar al Mercáu nel Boletín Oficial del Estáu (BOE).

IMPULSA ye la primer entidá pública n’España que llanza una Consulta al Mercáu col sofitu de la Iniciativa EAFIP de la Comisión Europea, siendo escoyíos nel añu 2016 col fin de llevar a cabu una esperiencia piloto para l’usu de procedimientos de Compra Publica Innovadora nel llogru de dicha ferramienta d’Analís Intelixente. La candidatura foi escoyida en base a cuatro aspeutos fundamentales:

• El concretu interés y el compromisu de desenvolver un proyectu de Compra. Pública Innovadora y el maduror del modelu de negociu.
• L’impactu potencial de la esperiencia piloto.
• L’equilibriu xeográficu de la selección de proyectos.
• L’aspeutu pioneru de la esperiencia piloto sol sistema llegal nacional.

L’asistencia técnica que facilita la iniciativa EAFIP ye una asistencia tantu llegal como técnica a lo llargo de tol procesu dende la preparación de la consulta de mercáu, fase na que tan somorguiaos nel presente, hasta’l momentu de la elección del procedimientu de contratación oportunu y la meyora del proyectu y les conclusiones de la consulta de mercáu.

Más información nel siguiente link: http://impulsa.gijon.es/page/17213-compra-publica-de-innovacion