El Conceyu Abiertu pola Oficialidá presentó’l so cartafueyu

El cartafueryu, que recueye’l manifiestu fundacional del Conceyu Abiertu pola Oficialidá (CAO), tien el sofitu de más d’un centenar d’empreses, asociaciones, profesionales lliberales, partíos políticos o sindicatos.
Fernando Ornosa y Xulio Casado, voceros del CAO, presentaron ayer el portfoliu de sofitu a la plataforma xunitaria en defensa de la Oficialidá como un primer momentu del llamáu a la sociedá a participar na manifestación del 18 de payares.
Fernando Ornosa fizo un llamáu d’atención pa que los dos partíos mayoritarios, PSOE-FSA y PP, escuchen la posición mayoritaria de la sociedá asturiana y que de cara a les prósimes elecciones incorporen la propuesta d’oficialidá pal asturianu, y pal gallego-asturianu, na prosima reforma estatutaria. Ornosa, refiriéndose a les declaraciones de Javier Fernández, dixo que pa la FSA “una plataforma -el CAO- na que participen más de 170 entidaes, que representen a miles d’asturianos, nun merez siquiera la consideración p’aconceyar con ella. Por más que falen del diálogu, niéguense a tenelu”. Casado incidió nel deber de les instituciones, y partíos, a recibir a la ciudadanía. Pa Xulio Casado esti cartafueyu supón una amuesa del sofitu que la ciudadanía apoya la reivindicación de la oficialidá. Ornosa considera que’l prosimu marcu llegal ha satisfacer los derechos de los asturianu falantes esixendo la igualdá de tratu y respetu que pa colos castellano falantes. Nello apuntó que “Ye la mio llingua, ye’l mio derechu. Ye la to llingua ye’l to derechu”, faciendo referencia a lo que supondría la oficialidá.
Xulio Casado esplicó’l diseñu de la campaña de la tercera manifestación del CAO, de la que’l portfoliu ye parte. Un candáu que s’abre con una llave que ye la oficialidá, acabar cola discriminación llingüística y solucionar el conflictu llingüísticu n’Asturies.