El CMPA valora positivamente los cambios introducíos pol Institutu Asturianu de la Mocedá na convocatoria de subvenciones d’esti añu

El Conseyu de la Mocedá del Principáu d’Asturies considera que les sos vindicaciones manteníes a lo llargu de los últimos meses por mor de l’anterior convocatoria de subvenciones del IAM empobinaes a les asociaciones xuveniles, dio’l so frutu na convocatoria del presente añu, asoleyada el martes nel Boletín Oficial del Principáu d’Asturies. El presidente de la entidá xuvenil, Paulino Feito, señaló que “en cumplimientu del protocolu al efectu, l’IAM remitiónos n’avientu un borrador de la que diba ser la convocatoria d’esti añu, que siguía manteniendo munchos de los erros incluyíos na de 2006, que produxeren un fuerte maltar ente bien d’asociaciones poles munches dificultaes inxustificaes que suponíen pa los solicitantes”. Díes depués, esplicó Feito, el Conseyu remitió al Institutu Asturianu de la Mocedá un Informe nel que se facíen un bon númberu de suxerencies que, teniendo en cuenta’l nuevu Reglamentu de la Llei Xeneral de Subvenciones, permitiríen meyorar el proyectu de convocatoria. “L’IAM incluyó casi toes, colo que la convocatoria resulta sustancialmente meyor que la del añu pasáu, qu’entovía sigue provocando serios perxuicios a les asociaciones xuveniles”. El responsable del CMPA considera que n’esti 2007 les subvenciones del Institutu Asturianu de la Mocedá resulten más asequibles pa les asociaciones y entidaes xuveniles, “de lo que mos debemos felicitar toos y toes porque favorez la participación de los y les moces de la nuesa comunidá autónoma”, dixo Paulino Feito, quien puntualizó que “pudo ser meyor que la Directora del IAM nun ficiere esperar a tou’l mundu p’atender a les demandes del movimientu asociativu no tocante a les subvenciones que d’ella dependen” anque puntualizó que “nunca ye tarde si de verdá tien la intención de rectificar toda una llexislatura enllena de desaciertos”.

La convocatoria publicada’l martes contempla tres llinies de proyectos subvencionables, diferenciando ente programes d’actividaes, servicios y funcionamientu internu, de contratación de mozos menores de 30 años, y de realización d’obres y compra d’equipamientu. Los formularios pa presentar les solicitues pueden alcontrase nes Oficines d’Información Xuvenil, los Conseyos de la Mocedá de Xixón, Uviéu y Asturies, y nel mesmu Institutu Asturianu de la Mocedá. Como ye avezao’l Conseyu de la Mocedá del Principáu d’Asturies va entamar una sesoría itinerante de bañdre pa toles asociaciones que tengan dalguna dulda sobre cómo pidir estes subvenciones.

Más información