El CAO ufierta na rede vídeos de personalidaes asturianes que piden la oficialidá de la llingua nel Estatutu d’Autonomía.

Les escritores Corín Tellado y Carmen Gómez Ojea, los músicos Víctor Manuel y Hevia, los deportistes Chechu Rubiera y Manuel Busto, amás de la presentadora de televisión Sonia Fidalgo, quixeron sumase a la iniciativa del Conceyu Abiertu pola Oficialidá y yá tán disponibles les sos declaraciones a favor de la oficialidá na páxina http://es.youtube.com/user/doilacara, onde se van dir colgando más vídeos en feches prósimes.

Como continuación y ampliación de la campaña del CAO “Doi la cara pola Oficialidá”, ofrécense estos vídeos d’una llista pergrande de personalidaes que se van dir publicando nos prósimos meses. Va poques semanes una representación del deporte asturianu d’élite tamién quixo participar na convocatoria y sacar la semeya col cartel de la campaña. Nesa ocasión fueron Samuel Sánchez (ciclista d’Euskaltel-Euskadi y medaya d’oru en Pekín 2008), Carlos Pérez (piragüista, campeón d’Europa, campeón del mundu y medaya d’oru en Pekín 2008), Javi Villa (pilotu GP2), Santi Cazorla (futbolista de 1ª División nel Villareal, campeón d’Europa 2008 cola Selección Española), Juan Mata (futbolista de 1ª División del Valencia), Pablo Álvarez (futbolista de 1ª División del Deportivo de la Coruña), Santi Pérez (ciclista del GAM-Relax, segundu clasificáu de la Vuelta a España del 2004), Manuel Enrique Mejuto (arbitru de fútbol internacional), Benjamín Noval (ciclista d’Astana), Adrián López (futbolista de 1ª División nel Málaga), Esteban Suárez (futbolista de 1ª División nel Almería), Carlos Barredo (ciclista del Quick Step), Alberto Hevia (pilotu, campeón d’España de Rallye 2004), César Martín (futbolista de 2ª División nel Hércules) y Javi Hernanz (piragüista, campeón d’España) los que decidieron respaldar la idea del Conceyu Abiertu pola Oficialidá.

El portavoz del CAO, Carlos Pulgar declaró con motivu de la publicación de los vídeos que “ye muncha xente lo que participa nesta iniciativa, más de 8.000 persones y cola cifra aumentando tol tiempu, colo que podemos volver a afirmar que la llingua asturiana tien un apoyu unánime na sociedá. N’Asturies son mui pocos los que-y ven problemes a la oficialidá del asturianu y munchos los que sabemos que, de nun consiguir esti estatus nel Estatutu d’Autonomía, l’idioma propiu d’Asturies quedaría espuestu a un peligru pergrave, como, per otra parte, reconoz el Conseyu d’Europa, órganu que ta acabante de desixir a les alministraciones competentes unes midíes firmes y urxentes, ente les que ta la oficialidá, que valgan p’aparar el desaniciu lentu pero imparable que sufre l’asturianu”.

Va poco, el míticu xugador del Sporting y del Barcelona, Enrique Castro “Quini”, y el delanteru del Valencia CF David Villa, “el guah.e”, yá sacaren la semeya de la campaña, amás del ciclista Chechu Rubiera y el piragüísta Manuel Busto.

El web de doi la cara ye doilacara.net, la galería de semeyes http://www.flickr.com/photos/doilacara/ y la canal de vídeos http://es.youtube.com/user/doilacara.