El CAO sigue alantre cola campaña “Doi la Cara pola Oficialidá” con un actu de recoyida de semeyes nel centru d’Uviéu

Tres del conceyu xeneral cellebráu’l pasáu sábadu día 7 de febreru na Biblioteca Pública del Principau’l Conceyu Abiertu pola Oficialidá prepara la continuación de la exitosa campaña “Doi la cara pola Oficialidá” con una serie d’actos de recoyida de semeyes que van facese nes principales capitales de Conceyu d’Asturies y que dempués van tener continuidá a lo llargo y ancho de la xeografía del pais. El primeru de los actos va ser na Plaza del Ayuntamientu d’Uviéu’l prósimu domingu día 22 de febreru a les 12:00.

Amás de reclama-y a la ciudadanía pa que se retrate col cartel de la campaña los miembros del CAO van contar con una pantalla onde van proyectase munches de les más de 8.500 semeyes algamaes, que se puen ver nel web oficial de la orixinal iniciativa doilacara.net, col añedíu de la proyeición de vidios de personalidaes asturianes qu’afalen a los partios parllamentarios a que s’incluya la Oficialidá na reforma del Estatutu d’Autonomía p’Asturies.<(p>