El CAO organiza una marcha ciclista pa pidir la oficialidá

Xixón va acoyer esti domingu una marcha en bicicleta organizada pol Conceyu Abiertu pola Oficialidá pa reclamar la oficialidá del asturianu na redaición del prósimu estatutu d’autonomía d’Asturies. Según informen los responsables del CAO nuna nota de prensa la marcha va entamar a les 12:00 hores delantre de la estatua de Pelayo, va siguir pe les cais del centru de la ciudá pasando en dos ocasiones pel Muru, pa finar nel mercáu municipal xuta’l campu de fútbol de El Molinón.

El CAO destacá na convocatoria que’esti momentu ye históricu pa resolver el problema llingüísticu n’Asturies. “Ye posiblemente la última oportunidá de poder cuntar, por fin, con un estatutu que s’axuste a la nuestra realidá cultural y llingüística, y que reconoza los mesmos drechos a tolos ciudadanos, falen la llingua que falen”, sorayen dende la organización.

“Asturies ye la única comunidá con llingua propia que nun la reconoció como oficial”, denuncia’l CAO, al tiempu que destaca que Asturies lleva un retrasu de venticinco años nesti sen con respectu al restu de comunidaes con llingua propia.

Conceyu Abiertu pola Oficialidá ye un organismu civil qu’engloba más de 200 asociaciones culturales de toa triba, partidos políticos y sindicatos y que tien como oxetu algamar la Oficialidá de la Llingua Asturiana nel estatutu d’autonomía d’Asturies