Portada Sociedá El CAO critica les posiciones del PP sobre la reforma estatutaria y recuerda’l so papel de cómpliz na negación de la oficialidá

El CAO critica les posiciones del PP sobre la reforma estatutaria y recuerda’l so papel de cómpliz na negación de la oficialidá

by asturnet

Carlos Pulgar, portavoz del Conceyu Abiertu pola Oficialidá, declaró esta mañana que “el Partíu Popular, depués d’andar xugando, enantes de les elecciones xenerales, al rendez vous col movimientu de reivindicación llinguística, llegó a la mesa estatutaria y nun perdió un minutu en contradicir tolo espuesto nel programa electoral, lo que nun ye otra cosa qu’un fraude a los sos propios votantes y al conxuntu de la sociedá asturiana.

Con ello convirtióse nel validor principal de les idees negadores de la oficialidá que tien la FSA pal asturianu. Les postures de los dos partíos mayoritarios d’Asturies cuerren en paralelo y amenacen con acabar cola tresmisión xeneracional de la llingua a mediu plazu, como alvierten organismos internacionales del altor del Conseyu d’Europa, les Naciones Uníes o la Unesco.

Pal CEO “estos fechos convierten al PP nel cómpliz necesariu que la FSA necesita pa siguir emburriando al asturianu pela cuesta abaxo. A lo que se ve esta ye la menera que tienen los populares asturianos d’interpretar los llamaos pa que l’alministración del estáu y l’asturiana tomen midíes firmes y urxentes que-y dean la vuelta a esta situación de peligru de muerte a la que se ve enfrentáu l’idioma propiu d’Asturies”.

Sobre la noticia de la propuesta del PP de volver retomar l’Estatutu d’Autonomía, el portavoz del Conceyu Abiertu quixo destacar que “se ve a les clares que con tal de xugar la partida de la desestabilización del gobiernu, por mui llexítima que seya, al Partíu Popular da-y igual que los asturianos acaben padeciendo un estatutu que nun-yos reconoza los derechos llingüísiticos”. Según Carlos Pulgar, esta forma d’encarar el procesu ye, de fechu, una partida coles cartes marcaes, onde dos de los xugadores, PP y FSA, apuesten el futuru del asturianu ensin da-yos muncho más. Asturies necesita un estatutu nuevu, un marcu llegal onde se vean contemplaos los derechos de los falantes, daqué a lo nun vamos renunciar nel CAO y llabor al que vamos siguir dedicándo-y tol esfuerzu. A estes altures son más de 8.000 ciudadanos y ciudadanes los que dan la cara pola oficialidá na nuestra campaña n’Internet, lo que ye una demostración más del abismu que separa a la FSA y al PP de lo que pide a diario la xente pa sacar al asturianu del pilancu nel que ta metíu”.

Tamién te podria gustar