El Bloque diz que l’Ayuntamientu quier desaniciar los chiringuitos nes Fiestes de San Mateo

El Bloque por Asturies (BPA), siguiendo col so enfotu en criticar la postura l’Ayuntamientu al respective, denunció esti día “la intención del equipu de gobiernu del Partíu Popular n’Uviéu d’acabar colos chiringuitos de les fiestes de San Mateo”.

Na nota de prensa el Bloque diz que “de va años p’acá tolos branos mos atopamos col mesmu cantar colos chiringuitos y los problemes que se-yos ponen”. Estes instalaciones son, según la nota, “la fonte de financiación principal de munches organizaciones, sociales, culturales y vecinales de la ciudá, a parte de representar lo poco que queda de popular nes fiestes de San Mateo; y la respuesta que reciben del equipu de gobiernu ye que cada vez tienen que pagar más por servicios de los que nun se beneficien sólo ellos”.

Darréu d’ello, nesta organización tan convencíos dafechu que “el señor Arias-Cachero pasa de decidir qu’estética tienen que tener los chiringuitos, col sacrificiu económicu que supón el cambiu pa les asociaciones, a creese col derechu de poder fiscalizales y cuestionales públicamente”, denuncia’l partíu, integráu na coalición IU-BA-Verdes.

El comunicáu pide sensatez “a los únicos responsables de querer zarrar los chiringuitos, que son el conceyal de Cultura Arias-Cachero, el conceyal de llicencies Alberto Mortera, y l’alcalde de la ciudá Gabino de Lorenzo”.