El Bloque afirma que nun va tar nun gobiernu con fuerces que nun apoyen la oficialidá nel Estatutu

El Bloque por Asturies condiciona la so presencia nel gobiernu autonómicu a los resultaos de la reforma l’Estatutu. La formación nacionalista sal al pasu de les declaraciones feches nos últimos díes por dirixentes de la FSA y d’Izquierda Xunida p’aclariar que’l compromisu de BA colos sos socios políticos ta arreyáu a que l’ampliación del autogobiernu y asuntos “tabú” como la cooficialidá se incluyan nel debate alrodiu’l nuevu Estatutu.

El Bloque, encabezáu pol so secretariu xeneral Roberto Colunga y el so portavoz nacional, el director de l’Axencia Asturiana de Cooperación, Rafael Palacio, celebraron esti viernes 20 una rueda de prensa pa desplicar la postura de la so organización énte l’escomienzu del alderique sobre la reforma estatutaria. Inda nun forme parte de los conteníos del pautu de gobiernu robláu ente BA, IX y PSOE, la nueva norma xurídica autonómica, ye considerada un asuntu crucial polos socios nacionalistes del executivu que preside Vicente Álvarez Areces pa caltener el so compromisu políticu. Nesi sen, Rafael Palacios fue claru: “El Bloque por Asturies nun va participar, nin agora nin nel futuru, en nengún gobiernu, coalición electoral o alcuerdu políticu permanente o coyuntural, con nenguna fuerza política que vote a favor o apoye una Reforma Estatutaria que nun reconoza los derechos políticos, económicos, sociales, culturales y llingüísticos que-y correspuenden a Asturies y tolos derechos humanos a tolos ciudadanos y ciudadanes sin exclusiones, ente ellos, la Oficialidá de la Llingua Asturiana y del Gallego-Asturiano”, afirmó na rueda de prensa’l portavoz nacional del Bloque.

El motivu central de la declaración pública del Bloque por Asturies fueron, según asegura esta formación: “les sucesives declaraciones públiques de dirixentes de la Federación Socialista Asturiana (FSA) nes que aseguraben el non reconocimientu de la oficialidá de la llingua asturiana na reforma prevista del Estatutu d’Autonomía p’Asturies y de les declaraciones públiques de dirixentes d’ Izquierda Xunida d’Asturies (IX) nes qu’ aseguraben que la presencia nel gobiernu asturianu d’IX nun taba condicionada pol resultáu de la reforma”. El Bloque desmárcase de los sos coaligaos d’Izquierda Xunida nesti asuntu y dexa claro agora que pa esta formación sí ta condicionada la so presencia nel gobiernu al resultáu del debate estatutariu y al llogru nél de la reconocencia de la oficialidá, ente otros asuntos que BA considera “irrenunciables”.