Dixebra y Ediciones Trabe faense col gallardón positivu de los Premios Andrés Solar

Los Premios Andrés Solar algamen nesti 2012 la so XXVIII edición. Como nos sos 28 años de vida, los premios tienen una vertiente doble: per un llau, la Xunta pola Defensa de la Llingua Asturiana, entidá convocante, premia a una entidá o persona que rescamplara pol so llabor en defensa o promoción del asturianu. Esti reconocimientu materialízase n’El Pegollu, que nesta ocasión quier reconocer el llabor incansable d’una formación musical, Dixebra, y una editorial, Trabe, que cumplen 25 y 20 años, respectivamente, “como proyectos fundamentales pa entender el desenrrollu cultural, social y económicu de la llingua asturiana nes últimes décades”, amás de “pol so apueste decidíu pola música y lliteratura a lo llargo de bien d’años, demostrando que l’asturianu ye una ferramienta útil y necesaria nel rellatu de la contemporaneidá d’Asturies”, espliquen dende la Xunta.

Los Premios Andrés Solar tienen tamién una versión negativa, que reconoz a persones o entidaes que rescamplaren pol so llabor negativu pa cola llingua asturiana. Esti duldosu honor represéntase con un “Madreñazu”, que na edición de 2012 va pa “los recortes en materia llingüística” y pa la “Llei Wert”. Y ye, espliquen dende la XDLLA, “nos últimos años, con diferentes gobiernos y cola pasividá de los grupos parllamentarios, tamos asistiendo a la aplicación d’un programa sistemáticu de desmantelamientu del texíu cultural y mediáticu n’asturianu”. No que cinca a la llamada Llei Wert, recuerden qu0“introduz brutales modificaciones que puen suponer un peligru de desaniciu de la enseñanza de la llingua, que yá ta nuna situación de marxinación llaceriosa”.

La entrega de los Premios va facese’l día 15 d’avientu a les 19:30 hores, nel Salón d’Actos del Vieyu Institutu de Xixón. L’actu va contar cola actuación musical de Dani Stylo que va facer reellaboraciones de temes hestóricos de Dixebra.

Tamién, como tolos años, depués de l’actu va haber una espicha nel chigre xixonés Canteli, la entrada val 20 euros. Pa dir, hai qu’acutar sitiu, y pa ello ha llamase al 985229553 o mandar corréu a info@exunta.org, primero d’esti 13 d’avientu.