Crease nel Val.le de L.laciana’l “Club Xeitu”

Un grupu de persones esmolecíes pola conservación de la cultura y la llingua en Caboalles d’Abaxo ta acabante crear l’asociación Club Xeitu, col envís de “recuperar y difundir los valores del Valle de L.laciana en particular y del monte occidental astur-lleonés en xeneral, asina como la proteición y revalorización de la so hestoria y patrimoniu”. Pa ello, van organizar nos próximos meses estremaes actividaes, “esistiendo la idea d’espublizar delles obres y documentos de relevancia”.

La presidencia honorífica de la mesma recairá en María Luisa Jorissen, mientres que’l vicepresidente sedrá Manuel Gancedo, correspondiendo’l cargu de secretariu a Víctor del Reguero y el de vocal a Juan Carlos Gómez-Barthe.

Ente los oxetivos más inmediatos del “Club Xeitu” tará la edición d’un boletín añal, baxo la cabecera de “Xeitu”, nel cual sedrán asoleyaos trabayos d’investigación y artículos venceyaos cola zona. El boletín saldrá’l branu próximu y sedrá distribuyíu principalmente ente los socios del club, si bien una parte de los exemplares sedrán puestos a la venta.

Otra de les actividaes previstes a curtiu plazu sedrá la organización del Concursu Lliterario en Pal.luezu (variedá suroccidental del asturianu) “Guzmán Álvarez”, n’homenaxe al recordáu filólogu babianu fináu va cuatro años. Nesti certame, del que sedrán presentaes les bases el mes d’abril próximu coincidiendo cola celebración de la Feria del Llibru en Vil.lablinu, estableceránse dos premios, ún pa la modalidá de poesía y otru en prosa. El xuráu d’esti certame tará presidíu por Roberto González-Quevedo, secretariu de l’Academia de la Llingua Asturiana.