Convocada pal próximu 25 de xineru la preba semestral de conocencia de l’Academia de la Llingua

Como tolos años a estes altures, l’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fai la primer convocatoria añal pa poder evaluar diches conocencies. Nesta primer convocatoria la preba va celebrase’l 25 de xineru de 2014 y el plazu de matrícula pa la mesma ye del 13 al 23 de xineru.

Nesi sen, da anuncia de les sos iniciatives pa conocimientu general:

Nos meses de xineru y mayu celébrense les pruebes, abiertes a toles persones interesaes. Unos quince díes enantes de les pruebes abreseun plazu de matrícula.Y a les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución.

Les persones que nun superen les pruebes del nivel 1 podrán presentase a nueves convocatories toles vegaes que-yos puya. Pal bon resultáu d’estes pruebes habrá tenese un dominiu básicu de les estayes que vienen darréu:

a. ESTAYA LLINGÜÍSTICA a.1. Teoría gramatical: conocencia y dominiu del funcionamientu gramatical del asturianu y de la normativa académica. a.2. Práutica escrita: emplegu amañosu de la llingua, puestu en práutica gracies a exercicios gramaticales y de composición escrita. a.3. Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador. b. ESTAYA DE LLINGUA Y SOCIEDÁ Conocencia del allugamientu de la llingua dientro de la sociedá asturiana asina como del procesu de normalización en que ta inxerta. 6. La prueba va tener dos partes, una escrita (dictáu, torna, exercicios gramaticales, redaición) y otra falada (conversación).

Resulta imprescindible conocer les xeneralidaes gramaticales de la llingua asturiana y los aspectos básicos de la so normativa ortográfica (Normes ortográfiques, ALLA, Uviéu, 2012, 7ª ed.; Gramática de la Llingua Asturiana, ALLA, Uviéu, 2008, 3ª ed. reimpresión). Asina mesmo, aconséyase la llectura de testos fechos acordies cola normativa, como los asoleyaos por esta Academia.